Թուրքիան ԱՄՆ վարչակազմին մեղադրում է Սիրիայի մասին ստելու մեջ և քննադատում պատժամիջոցները երկարաձգելու համար

ԱՄՆ վարչակազմը ճշմարտությունը չի ասում Կոնգրեսին և իր ժողովրդին: Այդ մասին հոկտեմբերի 9-ին ասել է Թուրքիայի արտգործնախարար Մևլյութ Չավուշօղլու` ի պատասխան Սիրիայում օկուպացիոն գործողության պատճառով Թուրքիայի դեմ պատժամիջոցները երկարաձգելու՝ Վաշինգտոնի որոշմանը:

«Թուրքիային մեղադրելու փոխարեն ԱՄՆ-ը պետք է հրաժարվի իր սխալ քաղաքականությունից և ավելի ազնիվ լինի ամերիկյան ժողովրդի ու Կոնգրեսի հետ», - ասել է Մևլյութ Չավուշօղլուն:

Ավելի վաղ՝ հինգշաբթի, Միացյալ Նահանգները մեկ տարով երկարաձգել է Թուրքիայի դեմ պատժամիջոցների ռեժիմը 2019 թվականին Սիրիայում գործողության պատճառով՝ հայտարարելով, որ Սիրիայում թուրքական ուժերի գործողությունները սպառնալիք են ազգային անվտանգության համար:

Հիշեցնենք, որ 2016 թվականից Անկարան երեք օկուպացիոն գործողություն է իրականացրել Սիրիայի հյուսիսում՝ իր սահմանի երկայնքով՝  «Եփրատի վահան» (2016), «Ձիթենու ճյուղ» ( 2018) և «Խաղաղության ակունք» (2019):