Իրաքի հետախուզության ղեկավարը Դամասկոսում բանակցություններ է վարել Սիրիայի նոր իշխանությունների հետ

Իրաքի հետախուզության ղեկավար Համիդ աշ Շաթրին այցելել է Դամասկոս և բանակցություններ վարել Սիրիայի նոր վարչակազմի ներկայացուցիչների հետ: Այդ մասին հայտարարել է Իրաքի կառավարության ներկայացուցիչ Բասեմ ալ Ավադին։

«Իրաքի պատվիրակությունը՝ հետախուզական ծառայության ղեկավար Համիդ աշ Շաթրիի գլխավորությամբ, հանդիպել է Սիրիայի նոր վարչակազմի հետ։ Նրանք քննարկել են իրադարձությունների զարգացումը Սիրիայում, երկու երկրների ընդհանուր սահմանին անվտանգության և կայունության ապահովման պահանջները», -իրաքյան ԶԼՄ-ները դեկտեմբերի 26-ին մեջբերել են նրա խոսքը:

Դեկտեմբերի 8-ին սիրիական զինված ընդդիմությունը հայտարարել է Դամասկոսը գրավելու և իշխանության անցումային մարմիններ ձևավորելու մասին։