ՔՊ-ական Գարիկ Սարգսյանը 1 մլն դոլարի պայմանագրեր է կնքել քեռու հետ․ ինչպե՞ս եք վերաբերվում․ Դանիելյանը՝ ԿԿՀ-ի ՔՊ-ական թեկնածուին

Կոռուպցիայի կանխարգելման հանձնաժողովի անդամի թափուր պաշտոնում ՔՊ-ն առաջադրվել է Նարինե Ազարյանի թեկնածությունը։
Նարինե Ազարյանից «Հայաստան» խմբակցության պատգամավոր Գառնիկ Դանիելյանը հետաքրքրվեց, թե ինչպե՞ս է վերաբերվում այն փաստին, որ ՔՊ-ական Գարիկ Սարգսյանը 1 մլն դոլարի պայմանագրեր է կնքել քեռու հետ ու մնացել անպատիժ։  
 

«Մի քանի շաբաթ առաջ մամուլում հրապարակվեց Վեդի համայնքի ղեկավար Գարիկ Սարգսյանի հետ կապված մի լուր, ըստ որի՝ իր քեռին 2018-ից մինչև 2024թթ․ 506 միլիոն դրամի տենդեր է շահել։ Ուզում եմ ձեր գնահատականը լսեմ, ո՞նց է լինում, որ էդ փոխկապակցված անձիք նման խոշոր տենդերներ են շահում»,- հարցրեց Դանիելյանը։
 

Ի պատասխան՝ Կոռուպցիայի կանխարգելման հանձնաժողովի անդամի թեկնածուն պատասխանեց․ «Օրենքով ամրագրված են այդ բոլոր հարբերությունների կարգավորումները։ Եթե առկա է շահերի բախում, եթե խախտվել է որևէ սահմանափակում, ապա նախատեսվում է տուգանք։ Իմ գնահատականն այն է, որ եթե առկա են կոռուպցիոն գործարքներ, օրենքով սահմանված կարգով պետք է պատժվեն»։

«Մենք էլ գիտենք, որ կան օրենքներ, բայց այդ օրենքները խախտվում են, պետք է կարողանաք ձեր հստակ գնահատականը տալ»,- արձագանքեց  Գառնիկ Դանիելյանը։

Նշենք, որ վերջերս hetq.am-ը նյութ էր հրապարակել, ըստ որի՝ 2023 թվականի օգոստոսի 30-ին Վեդու համայնքապետարանը 280 մլն դրամի պայմանագիր է կնքել «Նոյավան» ՍՊԸ-ի հետ։ Պայմանագրով նախատեսվում էր կառուցել Վեդի համայնքի Վանաշեն, Սիսավան, Գոռավան, Շաղափ և Գինեվետ բնակավայրերի խմելու ջրագծերը։ Ըստ լրատվամիջոցի՝ «Նոյավան» ՍՊԸ-ի 100% բաժնետերը Գրիգոր Մանուկյանն է։ Նա Վեդի համայնքի ՔՊ-ական ղեկավար Գարիկ Սարգսյանի մորեղբայրն է։

2018-2024 թթ. «Նոյավան» ՍՊԸ-ի հետ կնքվել է 15 պայմանագիր։ Պայմանագրերի ընդհանուր արժեքը կազմել է 506 մլն 134 հազար դրամ։ 

Մանրամասն՝ տեսանյութում։