«Հայաստան» խմբակցությունը կանոնակարգի քննարկման ու քվեարկման այս հակաօրինական գործընթացին չի մասնակցելու. Արմեն Ռուստամյան

ԱԺ «Հայաստան» խմբակցության պատգամավոր Արմեն Ռուստամյանն իր ելույթում կրկին հաստատեց, որ իրենք այսօր չեն մասնակցելու սահմանազատման վերաբերյալ կանոնակարգի մասին հարցի քննարկմանն ու քվեարկությանը․ «Այս կանոնակարգը հակասահմանադրական է և հակաօրինական, չի առնչվում ազգային պետական շահերի պաշտպանության հետ։ Երեկ հանդես ենք եկել համապատասխան հայտարարությամբ։ Երեկ հանձնաժողովի նիստում, որտեղ քննարկվեց կանոնակարգը, ոչ մի հարցի պատասխան լիարժեք չտրվեց, մնաց օդում կախված։ Այս ԱԺ-ն ձեռնամուխ է լինելու այդ կանոնակարգի վավերացմանը և այն պայմանում, որ Ադրբեջանում համընթասց գործընթաց տեղի չի ունենում, սա նոնսենս է։ Ռիսկեր ենք ստեղծում մեր երկրի համար։ «Հայաստան» խմբակցությունն այս հակաօրինական գործընթացին չի մասնակցելու»,- հայտարարեց Ռուստամյանը։

Նշենք , որ  ԱԺ-ն քննարկում էր «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովի ու Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի համատեղ գործունեության մասին» կանոնակարգը վավերացնելու մասին» նախագծի՝ օրակարգ ընդգրկելու  վեաբերյալ հարցը։