Հայաստանում կհասկանա՞ն Իրանի դեսպանի հայտարարությունների տողատակերը․ դիտարկում

Ամերիկահայ հասարակական-քաղաքական գործիչ, ՀՅԴ անդամ, իրավաբան Ռոբերտ Մարգարյանը գրում է․

«Հայաստանում Իրանի դեսպանն այս շաբաթ երկու կարևոր հարցազրույցներ ունեցավ: Մեկն իրանական մի լրատվամիջոցի, իսկ մյուսը «Ազատության ռադիոկայան»-ի հետ:

Տարբեր կարևոր ընդգծումների կողքին ուշագրավ էր հատկապես դեսպանի մեկ հայտարարությունը.՝ «Իրանը դեմ է տարածաշրջանում սահմանների փոփոխությանն ու գեոպոլետիկական փոփոխություններին»:

Ուշագրավ է հատկապես «գեոպոլետիկական փոփոխությունները» արտահայտությունը:

Անշուշտ դա տարբերվում է «սահմանների փոփոխությունից», այլապես հարգելի դեսպանը դրանք իրարից չեր առանձնացնի:

Թե ինչի է ակնարկում դեսպանը «գեոպոլետիկական փոփոխությունների» մասին հիշելով դժվար չէ գուշակել նկատի առնելով Հայաստանի կապակցությամբ որոշ արտաքին կողմերի վերջին «գերակտիվությունը»:

Իրանի դեսպանը դիվանագիտական լեզվով նաև հասկացնել է տալիս, թե ներկայիս վտանգավոր ու Իրանի համար ոչ-ցանկալի ընթացքից հրաժարվելու դեպքում Թեհրանն ինչ է առաջարկում բարեկամ Հայաստանին՝ գազի արտահանման կրկնապատկում և էլեկտրահաղորդման 3-րդ գծի շահագործում, որն արդեն 17 տարի է ինչ կառուցվում է ու դեռ ավարտին չի հասել:

Հայաստանում կհասկանա՞ն Իրանի դեսպանի հայտարարությունների տողատակերը: Դա արդեն ժամանակը ցույց կտա»: