Արցախցիները ստորագրահավաք են սկսել, բաց նամակով դիմում են Հայաստանի իշխանությանը

«Արցախյան 32 կազմակերպությունների կողմից ձևավորվել է Արցախի ժողովրդի կարիքների ապահովման նախաձեռնությունը, որը միտված է զբաղվել Արցախի ժողովրդի բնակարանային կարիքների ապահովման հարցերով՝ հաշվի առնելով ՀՀ կառավարությունում քննարկվող ծրագիրը և դրա վերաբերյալ ի հայտ եկած պաշտոնական պարզաբանումները, որոնք որոշակի հստակեցումներ են տալիս, թե ինչ սկզբունքներ, ինչ դրույթներ են ընկած այդ ծրագրի հիմքում»,-հրավիրված ասուլիսի ժամանակ այսօր հայտարարեց «Արցախի ժողովրդի շահերի ու իրավունքների պաշտպանության միություն» ՀԿ նախագահ Արտակ Բեգլարյանը:

Նա տեղեկացրեց, որ այդ 32 կազմակերպությունները բաց նամակ են հղել ՀՀ կառավարությանը, նաև ստորագրահավաք են սկսում. «Կառավարությանն ուղղված բաց նամակը հստակ առաջարկներ է պարունակում, թե մենք ինչ առաջարկներ ունենք այս ծրագրի վերաբերյալ»:

 «Արցախյան 3-րդ պատերազմում զոհված և անհայտ կորած զինծառայողների հարազատների միություն» ՀԿ նախագահ Արմեն Ասրյանն էլ ընթերցեց բաց նամակը՝ հետևյալ կետերով․

«Ծրագիրը հնարավորինս իրականացնել արցախյան  համայնքների պահպանման սկզբունքով, ծրագրի ժամկետը սահմանել երկու տարի՝ ակտիվ կերպով ներգրավելով միջազգային և սփյուռքյան ֆինանսական ռեսուրսներ: Բնակելի անշարժ գույք ձեռք բերելու նպատակով յուրաքանչյուր բռնի տեղահանված անձի հատկացնել բազային 5 մլն դրամ, որը համապատասխանում է մարզային բնակավայրերի երկրորդային շուկայի  միջին գներին:

Նշված գումարը հատկացնել բոլորին՝ անվերադարձելիության սկզբունքով:Արդյունավետ միջոցներ ձեռնարկել անշարժ գույքի շուկայում գների հետագա աճի կանխման ուղղությամբ, այդ թվում աջակցելով նոր բնակֆոնդի արագ եւ էժան կառուցապատման ծրագրերին:

Հրաժարվել ծրագրի շահառուների համար ներկայացվող ՀՀ քաղաքացիության պահանջից, որը հակասում է ՀՀ  օրենսդրությանն ու միջազգային մարդասիրական իրավունքի սկզբունքներին:

Առանց կրճատումների շարունակել բնակվարձի եւ կոմունալ ծախսերի համար ֆինանսական աջակցության 40+10 հազար դրամների ծրագիրը՝ մինչեւ տվյալ ընտանիքին բնակարանով ապահովելը:

Մինչև 3 անդամ ունեցող փոքր ընտանիքների համար ծրագրում նախատեսել առանձնահատուկ մոտեցում, յուրաքանչյուր ընտանիքի՝ ըստ անդամների քանակի, հատկացնել ողջամիտ չափի ֆինանսական աջակցություն գույք ձեռք բերելու նպատակով:

Ծրագրում սահմանել առաջնահերթությունները և լրացուցիչ արտոնություններ զոհվածների և առաջին խմբի հաշմանդամների ընտանիքների համար:

Ծրագրում նախատեսել նաև համակարգային լուծումներ բռնի տեղահանվածների կայուն զբաղվածության ապահովման համար:

Ծրագրի նախագիծը դնել հանրային լայն քննարկման և հաշվի առնել շահառուների մտահոգություններն ու առաջարկությունները:

Այս ծրագիրը պետք է նպաստի Արցախից բռնի տեղահանված անձանց միասնականությանը, ինքնության պահպնմանն ու արտագաղթի բացառմանը:

Ծրագիրը պետք է նաև հաշվի առնի Արցախ հնարավոր վերադարձի նպատակը՝ անհրաժեշտ պայմաններ ու գործողություններ ապահովելով այդ նպատակի համար»:

Բանախոսները նշեցին, որ ստորագրահավաքին կարող են միանալ բոլորը, անխտիր։

Մանրամասն՝ տեսանյութում։