«Հայկական նախագիծ» գիտակրթական հասարակական կազմակերպությունը մեկնարկում է ընդունելություն

«Հայկական նախագիծ» գիտակրթական հասարակական կազմակերպությունը մեկնարկում է ընդունելություն «Հայկական համալսարան» կրթական ծրագրի 2023-2024 թթ․ ուսումնական տարվա աշնանային հոսքում։ Կրթությունը «Հայկական համալսարանում» անվճար է։

Ո՞ՎՔԵՐ ԿԱՐՈՂ ԵՆ ԴԻՄԵԼ

 Դասընթացը նախատեսված է

• ֆորմալ բուհերի բակալավրիատի, մագիստրատուրայի, ասպիրանտուրայի ուսանողների,
• հայաստանյան հիմնախնդիրներով հետաքրքրված երիտասարդների,
• առանձին դեպքերում նաև՝ միջին և ավագ սերնդի ներկայացուցիչների համար։

Ի՞ՆՉ Է «ՀԱՅԿԱԿԱՆ ՀԱՄԱԼՍԱՐԱՆԸ»

«Հայկական համալսարանն» ազգային բացառիկ կրթական ծրագիր է։ Վերջինիս հիմքում ընկած է միջգիտակարգային դասընթաց, որտեղ համադրված են հասարակագիտական և հումանիտար գիտությունների մի քանի հիմնական գիտակարգեր՝ քաղաքագիտությունից մինչև տնտեսագիտություն ու սոցիոլոգիա, միջազգային հարաբերություններից մինչև պատմագիտություն, ինչպես նաև ընդհանրական, մտածողական, փոխանցելի, գործառնական, հասարակական-էմոցիոնալ, ինֆորմացիոն գրագիտության և հետազոտական հմտություններ։ 2021-2022 և 2022-2023 թթ. ուսումնական տարիներին «Հայկական համալսարանն» ունեցել է շուրջ 150 շրջանավարտներ։

Դասընթացը ներառում է տեսական դասախոսություններ, գիտակիրառական դասախոսություններ, վարպետության դասեր, սեմինարներ, գործնական աշխատանքներ, արտագնա դասախոսություններ և գիտարշավներ։ «Հայկական համալսարանի» անբաժան մաս է կազմում Հայկական ճամբար կրթաճանաչողական ծրագիրը։ Անցնող 2 ուսումնական տարիներին կազմակերպվել է ամառային և ձմեռային 2 ճամբար Հայաստանում, ինչպես նաև 10-օրյա ամառային ճամբար Իրանի Իսլամական Հանրապետությունում։

«Հայկական համալսարանում» դասավանդում են ավելի քան 40 մասնագետներ Հայաստանից (ներառյալ՝ Արցախից) և արտերկրից, որոնց թվում՝ գիտնականներ, փորձագետներ, հոգևոր դասի ներկայացուցիչներ, պետական գործիչներ, ռազմագետներ, գործարարներ։ 2023 թ․ մայիսի 7-ին Մայր Աթոռ Սուրբ Էջմիածնում կայացած հանդիպման ժամանակ Հայկական համալսարանի շրջանավարտներին և դասախոսական կազմին իր հայրապետական օրհնությունն է բաշխել Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոս Գարեգին Բ-ն։

Ո՞ՐՆ Է ՄԵՐ ԱՌԱՔԵԼՈՒԹՅՈՒՆԸ

«Հայկական համալսարանը» նպատակ ունի նպաստել հայաստանյան մարդկային-ինտելեկտուալ կապիտալի զարգացմանը, ազգային արժեքների և ազգային շահերի գիտահեն ընկալման հիման վրա փոխանցել միջազգայնորեն մրցունակ գիտելիքներ և հմտություններ, նպաստել ներկայիս պայմաններում հայկական շահի տեսանկյունից ճիշտ կողմնորոշվող և անհրաժեշտ փոփոխություն իրականացնող երիտասարդության զարգացմանը։

 Հայկական համալսարանի շրջանավարտն ունենալու է

• հասարակագիտական և հումանիտար առաջանցիկ գիտելիքներ,
• Հայաստանն ու տարածաշրջանը հասկանալու տեսա-կիրառական հմտություններ,
• քաղաքականությունն ինքնուրույն հասկանալու կարողություն,
• համապատասխան ոլորտների լավագույն մասնագետների հետ համատեղ աշխատելու առիթ և հնարավորություն,
• «Հայկական համալսարանի» երաշխավորությունն իր ուսումնաաշխատանքային հետագա գործունեության ժամանակ,
• գաղափարակից ընկերների ու գործընկերների ակտիվ շրջանակ,
• ձեռքբերված գիտելիքների և հմտությունների շնորհիվ հասարակական նշանակության նախագծերի հղացման և իրականացման հնարավորություն,
• ապագայում «Հայկական նախագծի», այդ թվում՝ «Հայկական համալսարանի շրջանավարտների միության» շրջանակներում զանազան ծրագրերի ներգրավվելու հնարավորություն,
• ավարտական վկայական։

Ո՞ՐՈՆՔ ԵՆ ՄԱՍՆԱԿՑՈՒԹՅԱՆ ՊԱՅՄԱՆՆԵՐԸ

Դասընթացն ԱՆՎՃԱՐ է։

Տևողությունը՝ 20 շաբաթ։

Ձևաչափը՝ առկա (կենդանի)։ Դասերն անցկացվում են «Հայկական նախագիծ» ՀԿ գրասենյակում աշխատանքային օրերին՝ երեկոյան ժ․ 18:30-21:30-ը, շաբաթական երեք անգամ։

Գնահատումն իրականացվում է ունկնդրի միջանկյալ և ավարտական քննությունների, գործնական առաջադրանքների արդյունքների և հաճախության հիման վրա։

Մասնակցությունն ամբողջ դասընթացին պարտադիր է։ Դասընթացի աշնանային հոսքը մեկնարկելու է 2023 թ. սեպտեմբերի 27-ին։

Ի՞ՆՉՊԵՍ ԴԻՄԵԼ

Դասընթացին մասնակցելու համար անհրաժեշտ է անցնել ընդունելության երկու փուլերը։ Առաջին փուլին մասնակցելու համար հարկավոր է մինչև սեպտեմբերի 11-ը ներառյալ ամբողջությամբ լրացնել այս հայտաձևը։

Ընդունելության երկրորդ փուլը ներառում է դիմորդի հետ կենդանի հարցազրույց։ Հարցազրույցի կհրավիրվեն միայն առաջին փուլն անցած դիմորդները։ Դիմորդների ընտրությունն իրականացվում է մրցութային հիմունքներով։ Տեղերը սահմանափակ են։

Հարցերի դեպքում գրե՛ք [email protected] էլեկտրոնային փոստի հասցեին՝ նամակի վերնագիր նշելով «Դիմում» բառը։