Հյուսիսային Կորեան երկու բալիստիկ հրթիռ է արձակել

Հյուսիսային Կորեան իրականացրել է երկու բալիստիկ հրթիռի արձակում։ Այս մասին տեղեկացրել է Kyodo գործակալությունը՝ հղում կատարելով Կորեայի Հանրապետության Զինված ուժերի Շտաբների պետերի կոմիտեին, փոխանցել է «Իզվեստիան»։

Նշվել է, որ հրթիռներն արձակվել են Ճապոնական ծովի ուղղությամբ։

Հարավկորեական Yonhap գործակալությունը, հղում կատարելով Շտաբների պետերի միավորված կոմիտեին, տեղեկացրել է, որ Հյուսիսային Կորեան արձակել է բալիստիկ հրթիռ արեւելյան ծովի ուղղությամբ հուլիսի 24-ի գիշերը (տեղի ժամանակով)։

Զինվորականները վերլուծում են թռչող սարքի մանրամասն բնութագրերը, ինչպիսին են դրա տեսակն ու թռիչքի հեռավորությունը։

Ավելի վաղ՝ հուլիսի 18-ին տեղեկացվել էր, որ հյուսիսկորեական փոքր հեռահարության երկու բալիստիկ հրթիռ ընկել է արեւելյան ծովում՝ թռչելով 550 կիլոմետր։

Մինչ այդ՝ հուլիսի 16-ին, Հարավային Կորեան, ԱՄՆ-ն եւ Ճապոնիան եռակողմ զորավարժություններ էին անցկացրել Ճապոնական ծովի միջազգային ջրերում։ ԶԼՄ-ների տեղեկացմամբ՝ զորավարժություններն ուղղված էին երեք երկրների զինվորականների  ունակությունների կատարելագործմանը բալիստիկ հրթիռներին արձագանքելու գործում։