Ադրբեջանական կողմը հակված է եռակողմ հայտարարության կատարմանը․ Աբդոլլահիան

Չմիավորման շարժման մասնակից երկրների արտգործնախարարների հանդիպման շրջանակներում իր ելույթում Իրանի ԱԳ նախարար Հոսեյն Ամիր Աբդոլլահիանը հայտարարել է, որ Հարավային Կովկասի տարածաշրջանում վեճերը հնարավոր է լուծել խաղաղ ճանապարհով, գրում է IRNA-ն։

Նրա խոսքով՝ Ադրբեջանի նախագահ Իլհամ Ալիեւի հետ հանդիպման ժամանակ ինքը համոզվել է, որ ադրբեջանական կողմը հակված է եռակողմ հայտարարության կատարմանը:

Աբդոլլահիանը հավելել է, որ Ադրբեջանն աջակցում է հաղորդակցությունների եւ տրանսպորտային ուղիների բացմանը, ինչն արտացոլված է եռակողմ հայտարարության մեջ: «Այս տարածաշրջանը տարանցիկ մեծ ներուժ ունի։ Իրանն աջակցում է համագործակցությանը այդ նպատակի, ներուժի իրականացման համար»,-ասել է նա։

Նա նաեւ նշել է, որ Իրանը միշտ դեմ է եղել տարածաշրջանում սահմանների փոփոխությանը։