ՀՀ ֆինանսների նախարարն ընդունել է Զարգացման ֆրանսիական գործակալության ներկայացուցիչներին

ՀՀ ֆինանսների նախարար Վահե Հովհաննիսյանն այսօր հանդիպում է ունեցել Հայաստանում Ֆրանսիայի Հանրապետության արտակարգ և լիազոր դեսպան Անն Լույոյին և Հարավային Կովկասում Զարգացման ֆրանսիական գործակալության (ԶՖԳ) ներկայացուցչության տնօրեն Ռաֆայել Ժոզանի հետ: Հանդիպմանը ներկա են եղել, ԶՖԳ և Ֆինանսների նախարարության ներկայացուցիչներ:

Ողջունելով հյուրերին՝ նախարար Հովհաննիսյանը նշել է, որ բարձր է գնահատում Հայաստանի և Ֆրանսիայի միջև երկկողմ արդյունավետ համագործակցությունն ու երկարամյա գործընկերությունը: Նախարարը կարևորել է ֆրանսիական կողմի օժանդակությունը ՀՀ կառավարության կողմից իրականացվող բարեփոխումներին: Այս իմաստով հատկապես ընդգծվել է ԶՖԳ-ի Ասիական զարգացման բանկի հետ համատեղ 2022թ. իրականացված բյուջետային աջակցության ծրագրի կարևոր նշանակությունը:

Զրուցակիցները քննարկել են ԶՖԳ կողմից իրականացվող ընթացիկ ծրագրերն ու համագործակցության հնարավոր նոր ուղղությունները: Մասնավորապես անդրադարձ է եղել էներգետիկայի, ոռոգման և ջրային ռեսուրսների կառավարման ոլորտներում համագործակցության հեռանկարներին:

Ֆրանսիական կողմը վերահաստատել է պատրաստակամությունը՝ երկկողմ համագործակցությունը էլ ավելի խորացնելու և Հայաստանին տարբեր ուղղություններով աջակցելու վերաբերյալ:

ՀՀ ֆինանսների նախարարություն