Ադրբեջանը Արցախի ներկայացուցիչներին կրկին հրավիրել է Բաքու՝ խոսելու «վերաինտեգրման» մասին

Ադրբեջանի նախագահի աշխատակազմը հերթական անգամ առաջարկել է «Ղարաբաղի հայ համայնքի» ներկայացուցիչների հետ երկրորդ հանդիպումն անցկացնել Բաքվում. այս մասին ասված է Իլհամ Ալիեւի վարչակազմի` այսօր՝ մարտի 27-ին, տարածած հաղորդագրության մեջ։

«Ադրբեջանի Հանրապետության նախագահի աշխատակազմը մարտի 1-ին Խոջալու (Իվանյան) քաղաքում տեղի ունեցած հանդիպման և մարտի 13-ի հրավերի շարունակությամբ Ղարաբաղի հայ համայնքի ներկայացուցիչներին ևս մեկ անգամ հրավիրում է հանդիպում անցկացնել Բաքվում ապրիլի առաջին շաբաթվա ընթացքում` քննարկելու վերաինտեգրման հարցերը, ինչպես նաև Ղարաբաղում ենթակառուցվածքային նախագծերի իրականացումը»,  - նշվում է հայտարարության մեջ։

Ադրբեջանի ներկայացուցիչների հետ հանդիպումները կարող են շարունակվել ռուս խաղաղապահների միջնորդությամբ և տեղի ունենալ այնտեղ, որտեղ տեղի է ունեցել նախորդ հանդիպումը՝ մարտի 1-ին Արցախի Ասկերանի շրջանի Իվանյան գյուղում տեղակայված ռուսական խաղաղապահ ուժերի շտաբում. այս մասին դեռ մարտի 13-ին հայտարարել էր Արցախի  արտաքին գործերի նախարարության հայտարարության մեջ։