կարևոր
4144 դիտում, 1 տարի առաջ - 2023-02-27 23:43
Աշխարհ

Միխեիլ Սաակաշվիլիի վիճակը ծայրահեղ ծանր է․ բժիշկ

Միխեիլ Սաակաշվիլիի վիճակը ծայրահեղ ծանր է․ բժիշկ

Վրաստանի նախկին նախագահ Միխեիլ Սաակաշվիլիի վիճակը, ով բուժում է անցնում Թբիլիսիի կլինիկաներից մեկում, ծայրահեղ ծանր է, եթե քաշի կորուստը շարունակվի, անդառնալի գործընթացներ կսկսվեն։ Այս մասին երկուշաբթի հայտարարել է Վրաստանի օմբուդսմենի գրասենյակի բժիշկ Գիորգի Գրիգոլիան, փոխանցում է «ՌԻԱ Նովոստի» լրատվական գործակալությունը։

«Կախեքսիան վատանում է: Այն, ինչ տեղի է ունենում Սաակաշվիլիի հետ, բնական է՝ նա նիհարում է, մկանների եւ արդեն ոսկրային հյուսվածքի քայքայման գործընթաց է ընթանում։ Դա տեղի է ունենում, քանի որ նա համարժեք բուժում չի ստանում», - լրագրողներին ասել է Գրիգոլիան: Նրա խոսքով, եթե «քաղաքական գործչի քաշը իջնի մինչեւ 55 կիլոգրամ, ապա անդառնալի գործընթացներ կսկսվեն, նա գամված կլինի անկողնուն»։ Բժիշկը նշել է, որ այս պահին Սաակաշվիլին 64 կիլոգրամ է, սակայն նիհարելու միտումը շարունակվում է։

Օմբուդսմենի գրասենյակի բժիշկները փետրվարի 19-ին զննել են Սաակաշվիլիին։ Բժիշկների խմբի պաշտոնական եզրակացության մեջ ասվում է, որ հիվանդի մոտ առկա է հավասարակշռության եւ համակարգման կորուստ, մտավոր ֆունկցիաների նվազում, մարմնի հյուսվածքների ինքնապառակտման գործընթաց, մկանային ատրոֆիա, չորրորդ աստիճանի կախեքսիա, ծայրամասային եւ վեգետատիվ նյարդաբանություն։

Սահակաշվիլիի ընտանիքի անդամներն հայտնում են քաղաքական գործչի ծանր վիճակի մասին։ Ավելի վաղ անկախ բժիշկները հայտնել էին, որ Սահակաշվիլին թունավորվել է ծանր մետաղներով։ Թբիլիսիի քաղաքային դատարանը քննել է Սաակաշվիլիի ազատազրկման ժամկետը հետաձգելու գործը՝ արտերկրի կլինիկայում բուժվելու նպատակով, սակայն դատարանը մերժել է փաստաբանների խնդրանքը։