կարևոր
2698 դիտում, 1 տարի առաջ - 2023-01-12 15:12
Քաղաքական

Հայաստանը, ցավոք, բաց թողեց Մոսկվայում Ադրբեջանի հետ Լաչինի միջանցքի շուրջ իրավիճակի քննարկման լավ հնարավորությունը. Զախարովա

Հայաստանը, ցավոք, բաց թողեց Մոսկվայում Ադրբեջանի հետ Լաչինի միջանցքի շուրջ իրավիճակի քննարկման լավ հնարավորությունը. Զախարովա

ՌԴ ԱԳՆ պաշտոնական ներկայացուցիչ Մարիա Զախարովան ամենշաբաթյա ճեպազրույցի ժամանակ հայտարարել է, որ Մոսկվային մտահոգում են վերջին շաբաթներին Բաքվի և Երևանի հարաբերություններում նկատվող բացասական միտումները, կտրուկ հռետորաբանության ակտիվացումն ու մեղադրանքներով փոխանակումը, ինչն ուղեկցվում է տարածաշրջանում լարվածության աճով:

«Ադրբեջանական և հայկական կողմերին կոչ ենք անում բարի կամք դրսևորել ու համատեղ փնտրել փոխզիջումներ: Մոսկվան պատրաստ է դրան ամեն տեսակի աջակցություն ցուցաբերել», - ասել է Զախարովան:

«Հայաստանը, ցավոք, բաց թողեց նախորդ տարվա դեկտեմբերի 23-ին Մոսկվայում ադրբեջանցիների հետ բանակցային հաջորդ փուլն անցկացնելու լավ հնարավորությունը, որը կարող էր օգտագործել խնդրահարույց հարցեր, այդ թվում` Լաչինի միջանցքի շուրջ իրավիճակի քննարկման համար: Բայցևայնպես, մեր առաջարկն ուժի մեջ է, մենք պատրաստ ենք հարթակ տրամադրել Հայաստանի և Ադրբեջանի արտգործնախարարների հանդիպման համար», - ասել է Զախարովան:

ՌԴ ԱԳՆ ներկայացուցիչն ասել է, որ Մոսկվան շարունակում է Լաչինի միջանցքի ամբողջական ապաշրջափակմանն ուղղված աշխատանքները՝ 2020 թվականի նոյեմբերի 9-ի եռակողմ հայտարարության համաձայն:

«ՌԴ ներքին գործերի, պաշտպանության նախարարությունների, ռուսական խաղաղապահ զորակազմի հրամանատարության միջոցով հետևողական քայլեր են ձեռնարկվում իրավիճակի ապաէսկալացման ուղղությամբ: Անհրաժեշտ է գտնել լուծում՝ ընդունելի բոլոր կողմերի համար: Ներկայում միջանցքով անցնում են մարդասիրական օգնությամբ բեռնված ավտոշարասյուներ», - ասել է Զախարովան:

Նա ևս մեկ անգամ ընդգծել է, որ ռուս խաղաղապահների նկատմամբ հրապարակավ հարձակումներն ու նրանց դեմ սադրանքներն անընդունելի են: