«Ես եմ» ծրագիրը տապալվել է 4 տարվա ընթացքում՝ հենց այս իշխանության օրոք. Գեղամ Մանուկյան

Ազգային ժողովը 73 կողմ, 3 դեմ, 23 ձեռնպահ ձայներով առաջին ընթերցմամբ ընդունեց կառավարության կողմից ներկայացված «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին» օրենքի նախագիծը:

Վարման կարգով «Հայաստան» խմբակցության պատգամավոր Գեղամ Մանուկյանը ասաց. «Այս նախագծի հետ կապված բնական է, որ  անհնար է մերժել Զինված ուժերի բարեփոխումների, կամավորության սկզբունքով երկարատև ծառայության  անցնելու ցանկացած նախաձեռնություն,  դա խրախուսելի է և  այս օրինագիծը միտված էր դրան։ Բայց հիմնավորումներում նշված է, որ «Ես եմ» ծրագիրը տապալվել է, որը ներդրվել էր դեռ  2017 թվականին, բայց արձանագրենք, որ այն տապավել է 4 տարիների ընթացքում՝ այս  իշխանության օրոք»։

Ալեն Սիմոնյանը հետաքրքրվեց՝ թե ի՞նչ կապ ունի սա վարման կարգի հետ։

Գեղամ Մանուկյանը արձագանքեց, որ վարման կարգով ձայն է խնդրել մեկնաբանելու համար իրենց ձեռնպահ քվեարկելը:
Ալեն Սիմոնյանը պահանջեց անջատել ընդդիմադիր պատգամավորի խոսափողը։