Իսրայելը հարվածներ է հասցրել Սիրիայում ռազմական օբյեկտների. կան զոհեր

Շաբաթ՝ մայիսի 21-ի գիշերը Իսրայելը հարվածներ է հասցրել Դամասկոսի մի քանի թիրախների, ինչի հետևանքով երեք մարդ է զոհվել։ Օդանավակայանում հրդեհ է բռնկվել, որը նույնպես հարձակման է ենթարկվել, և առնվազն երկու չվերթ հետաձգվել է. հայտնում են սիրիական լրատվամիջոցները։

Սիրիական բանակը հաստատել է այս տեղեկությունը։ Իսրայելը դեռ չի մեկնաբանել։

Նշվում է, որ հարվածներն իրականացվել են «երկիր-երկիր» հրթիռներով, այլ ոչ թե Իսրայելի ռազմաօդային ուժերի մարտական ինքնաթիռներով։

«Իսրայելական թշնամին «երկիր-երկիր» հրթիռներով հարձակում է իրականացրել սիրիական Գոլանի բարձունքների տարածքից, որոնք օկուպացված են թշնամու կողմից: Մեր ՀՕՊ համակարգն աշխատել է և խոցել հրթիռների մեծ մասը», - նշվում է սիրիական բանակի հայտարարության մեջ։