Այն, որ իշխանությունները սահմաններն անցել են, անհետևանք չի մնալու. Ագնեսա Խամոյան

Իշխանությունը խուճապի մեջ է, իսկ այդ խուճապն էլ պայմանավորված է նրանով, որ «Դիմադրություն» շարժումը օր օրի թափ է հավաքում: Այս մասին այսօր՝ մայիսի 10-ին, անհնազանդության երթի մեկնարկին լրագրողների հետ զրույցում նշեց ԱԺ «Հայաստան»  խմբակցության պատգամավոր Ագնեսա Խամոյանը:

«Փաշինյանը փորձում է շարժումը մարել՝ իր տրամաբանությամբ, և դիմում է հին ու «բարի» մեթոդներին. բոլոր իշխանությունների ժամանակ այդ ամենը գործի է դրվել: Անբարոյականություն է, երբ այդ գործողղությունների մեջ ներքաշվում են տարեց մարդիկ»,- ասաց պատգամավորը:

Ըստ Ագնեսա Խամոյանի՝ այն, ոև, որ իշխանությունները սահմաններն անցել են, անհետևանք չի մնալու, և նրանք հնարավորություն չեն ունենա կասեցնել այս շարժումը:

«Ապօրինի ազատազրկումների հարցով․ Ս.Բագրատյանի որդին, որը մարդ էր ծեծել, հիմա հետախուզման  մեջ է: Ն.Փաշինյանի ավտոշարասյանը ուղեկցող վարորդը, որ հղի կնոջ էր վրաերթի ենթարկել, հիմա ազատության մեջ է: Այսինքն՝ երբ գործը վերաբերում է ընդդիմադիրներին, անմիջապես ձերբակալություն, կալանք, իսկ երբ գործը  վերաբերում է իրենց իշխանությանը՝ օրենքը թույլատրում է իրենց թողել ազատության մեջ»,- եզրափակեց Ագնեսա Խամոյանը:

Նշենք, որ նախօրեին ԱԺ փոխխոսնակ, «Հայաստան» խմբակցության պատգամավոր Իշխան Սաղաթելյանը հայտարարեց, որ այսօր՝ ժամը 12-ին, չորս ուղղությունով սկսելու են անհնազանդության երթեր և ակցիաներ։ Առաջին երթը կմեկնարկի Գայի պողոտայից՝ «Մեգամոլ» առևտրի կենտրոնի մոտից, երկրորդը Րաֆֆու փողոցից՝ Անդրանիկի արձանի մոտից, երրորդը՝ 15 թաղամասից՝ Չաուշի արձանի մոտից, և չորրորդը՝ Սասունցի Դավթի արձանի մոտից։

Ժամը 19.00-ին Ֆրանսիայի հրապարակում տեղի կունենա ամփոփիչ հանրահավաք։