Պուտինը մայիսի 9-ի համար կարեւոր հայտարարություն է պատրաստում. The Daily Mail

Պուտինը հայտարարություն է պատրաստում մայիսի 9-ին Ուկրաինային վճռական հարված հասցնելու համար բնակչության զանգվածային մոբիլիզացիայի մասին. հայտնում է The Daily Mail-ը՝ վկայակոչելով Մեծ Բրիտանիայի պաշտպանության նախարարին։

Ուրբաթ ելույթ ունենալով՝ Մեծ Բրիտանիայի պաշտպանության նախարար Բեն Ուոլեսն ասել է, որ ՌԴ նախագահը կարող է նոր պատերազմ հայտարարել «աշխարհի նացիստներին» Երկրորդ համաշխարհային պատերազմում Ռուսաստանի հաղթանակը նշող շքերթի ժամանակ: Դրանից հետո կհայտարարվի բանակի զանգվածային զորակոչ։

«Ես չեմ զարմանա, որ նա, հավանաբար, պատրաստվում է հայտարարել, որ «մենք այժմ պատերազմում ենք ամբողջ աշխարհի նացիստների հետ, և մենք պետք է իրականացնենք ռուս ժողովրդի զանգվածային մոբիլիզացիա»: Պուտինը, որը գրեթե ամեն կերպ ձախողվել է, կարող է փորձել ամրապնդել այն, ինչ ունի… և պարզապես դառնալ մի տեսակ քաղցկեղ երկրի ներսում»,- ասել է Ուոլեսը:

Նա պարզաբանել է, որ ստույգ տվյալներ չունի, բայց Պուտինը, հնարավոր է, ծրագրել է նման հայտարարություն անել՝ հաշվի առնելով իր նախկին մեկնաբանությունները:

«Մենք տեսել ենք Պուտինի մի շարք հայտարարություններ այն մասին, որ սա վերածվում է պրոքսի պատերազմի, և որ «նացիստներն ամենուր են», «ոչ միայն Ուկրաինայում, այլև ՆԱՏՕ-ն լի է նացիստներով»։ Կարծում եմ՝ նա կփորձի հրաժարվել իր «հատուկ գործողությունից»,- ասել է Ուոլեսը։ 

Նա նաև քննադատել է Կրեմլի «ողորմելի փորձերը»՝ կոծկելու իր կորուստները, և հավելել, որ Ռուսաստանի համար իր ռեզերվների զանգվածային մոբիլիզացման հրամանը «ձախողման խոստովանություն» կլինի։