Եթե խոսում ենք զոհի մասին, ապա չպետք է դիտարկենք, թե ինչ հանգամանքներում է զոհվել. Թագուհի Թովմասյան

Շատ կարևոր նախաձեռնություն ենք քննարկում, որով հնարավորություն է տրվում հայոց բանակում զոհված զինծառայողների ընտանիքներին, որպեսզի նրանք այլևս չուղարկեն բանակ իրենց տղաներին և վիշտը նորից չթարմանա։ Այս մասին ԱԺ-ում քննարկվող՝ զոհված հայր, մայր, քույր, եղբայր ունեցողներին պարտադիր զինվորական ծառայությունից ազատելու օրենսդրական նախաձեռնությանն անդրադառնալով՝ ասաց «Պատիվ ունեմ» խմբակցության պատգամավոր Թագուհի Թովմասյանը։

Վերջինս նշեց, որ այս համատեքստում ակնհայտորեն հավասարության խնդիր ենք ունենում։

«Եթե խոսում ենք զոհի մասին, ապա չպետք է դիտարկենք, թե ինչ հանգամանքներում է զոհվել։ Ընտանիքը երեխային տվել է բանակին, հայկական բանակը 2 տարի պատասխանատվություն է կրում ընտանիքի անդամի համար, 2 տարվա ընթացքում զինծառայողը ենթարկվում է հրամաններին և իր կամքից անկախ իրականացնում ծառայություն առաջնագծում կամ զորամասում։ Անկախ այն հանգամանքից, թե ինչ պատճառով է զոհվել զինծառայողը, պետք է դառնա շահառու։ Ցանկացած ընտանիքի համար էական չէ՝ ինչ հանգամանքներում է իր որդին զոհվել, նա ունի զոհ, հետևաբար՝ մյուս երեխաները չպետք է գնան ծառայության։ Ծնողը ինչո՞վ պետք է իրեն արդարացնի, ասի՝ գիտեք, իմ որդին չի զոհվել մարտական գործողությունների ժամանակ, այլ, օրինակ, էլեկտրահարվել է, դրա համար իմ մյուս տղան էլ պետք է գնա ծառայի՞»,- ասաց Թովմասյանը։

Պատգամավորի խոսքով՝ սա խտրական մոտեցում է։