Մենք նահանջում ենք ժողովրդավարությունից. Թագուհի Թովմասյան

Խաղաղ ցուցարարների նկատմամբ իրականացվող բռնություններն ու հարկադրանքի գործողությունները ոչ այլ ինչ են, քան ուղղակի ապտակ ժողովրդավարությանը. խորհրդարանական ճեպազրույցների ժամանակ հայտարարեց Մարդու իրավունքների պաշտպանության և հանրային հարցերի մշտական հանձնաժողովի նախագահ, «Պատիվ ունեմ» խմբակցության պատգամավոր Թագուհի Թովմասյանը:

Նա անընդունելի համարեց ընդամենը քաղաքական ակցիային մասնակցելու կամ քաղաքական միտք արտահայտելու համար քաղաքացուն ձերբակալելը և դեպքի վայրից բերման ենթարկելը:

«Մենք լայն քայլերով նահանջում ենք ժողովրդավարությունից»,- հայտարարեց Թագուհի Թովմասյանը:

Անդրադառնալով հարցին, թե ինչպես է ստացվել, որ Մոսկվա մեկնած ԱԺ պատվիրակության կազմում ընդդիմությունից միայն «Պատիվ ունեմ» խմբակցության պատգամավորներ Թագուհի Թովմասյանը և Իշխան Զաքարյանն են եղել, նա նշեց, որ իր մասնակցության հարցը քննարկել է խմբակցության ղեկավարի հետ:

«Պատվիրակություն կազմողը պետք է պատասխանի, թե ում ՞նչ սկզբունքով կամ ում երբ է հրավիրել, ով ինչ պատասխան է տվել։ Ես քննարկել եմ խմբակցության ղեկավարի հետ և իմ քայլերի մասով բացառապես ես եմ պատասխանատու։ Չեմ կարծում, որ որևէ այլ մեկնաբանություն այստեղ ընդհանրապես գոյության իրավունք ունի, որովհետև զարմանալի չէ, որ խորհրդարանական պատվիրակության կազմում կարող են լինել պատգամավորներ»,- ասաց Թագուհի Թովմասյանը։

Պատգամավորը հայտնեց, որ Մոսկվայից եղել է հրավեր ԱԺ նախագահին և ձևավորվել է պատվիրակություն, իսկ այցը ճանաչողական էր:

Ինչ վերաբերում է իշխանության հետ հարաբերությունների վերաբերյալ հարցին, պատգամավորն ասաց. «Այո՛, ես եղել եմ «Իմ քայլը» խմբակցության անդամ և դուրս եմ եկել խմբակցությունից, ու եթե ցանկություն ունենայի այս իշխանությունների հետ որևէ ընդհանուր բան ունենալու, կշարունակեի մնալ խմբակցությունում, որևէ կաշկանդող բան չէր լինի»: