Մոտ մեկ միլիոն ուկրաինացի փախստական ​​է դարձել մեկ շաբաթվա ընթացքում. ՄԱԿ

Ուկրաինայում «ռուսական ռազմական գործողության» մեկ շաբաթվա ընթացքում ուկրաինացի փախստականների թիվը հասել է 1 միլիոնի. հայտնում է ՄԱԿ-ի փախստականների հարցերով գործակալությունը։ Վերջին երեք օրվա ընթացքում, ըստ BBC-ի, փախստականների թիվը կրկնապատկվել է՝ երկուշաբթի ՄԱԿ-ը հայտնել է կես միլիոն մարդու մասին։

Փախստականների մեծ մասը՝ հարյուրհազարավոր մարդիկ, ըստ ՄԱԿ-ի, գնացել են Լեհաստան։

Համեմատության համար՝ ամբողջ 2015 թվականին Սիրիան, Իրաքը և Աֆղանստանը լքել է մոտ 1,3 միլիոն մարդ։

ՄԱԿ-ի գերագույն հանձնակատար Ֆիլիպո Գրանդին կոչ է արել ռուս զինվորականներին՝ դադարեցնել ուկրաինական քաղաքների հրետակոծությունը, որպեսզի տուժածներին օգնության հասնեն հումանիտար առաքելությունները՝ կենսական անհրաժեշտության պարագաներով:

Փորձագետների գնահատմամբ՝ ուկրաինական ճգնաժամը կարող է 12 միլիոն մարդու անօթեւան թողնել։