Աշխարհում 42 միլիոն փախստական կա

Աշխարհում 42 միլիոն փախստական կա. այս տեղեկությունը ներկայացված է Համաշխարհային բանկի աշխարհի զարգացման մասին տարեկան զեկույցում, որը նվիրված է հակամարտություններին, անվտանգությանը եւ երկրների զարգացմանը. տեղեկացնում է mignews.com-ը:

42 միլիոնը մոտավորապես Կանադայի եւ Լեհաստանի ընդհանուր բնակչության թիվն է: Այդ մարդիկ ստիպված են եղել լքել իրենց բնակության վայրերը հակամարտությունների, մարդու իրավունքների խախտումների, բռնությունների պատճառով:

ՀԲ մասնագետների կարծիքով` 15 մլն մարդ ստիպված է եղել փախչել արտասահման, մյուսներն ապաստան են գտել իրենց երկրների այլ տարածքներում:

Փաստաթղթում նշվում է, որ հակամարտությունների առաջացման հավանականությունը մեծ է այն երկրներում, որտեղ ոտնահարվում են մարդու իրավունքները:

Հիմք ընդունելով «քաղաքական ահաբեկչության 5-բալանոց սանդղակը», որում հաշվի են առնվում քաղաքական գործունեության համար մարդկանց ապօրինի ձերբակալությունները, կտտանքները, ապօրինի մահապատիժները, զեկույցի հեղինակները նշում են, որ  ցուցանիշների վատացումը 1 բալով 43 տոկոսով մեծացնում է մոտակա 5 տարում քաղաքացիական պատերազմի ռիսկը: Նույնքան մեծ է ռիսկը այն պետություններում, որտեղ ցածր է կառավարման արդյունավետությունը, չի ապահովվում օրենքի գերակայությունը եւ պայքար չի մղվում կոռուպցիայի դեմ: