Մահվան ելքով ավտովթար Արմավիրի մարզում. «Սևանի գաղութում» հաշվառված 42-ամյա վարորդը Nissan-ով գլխիվայր շրջվել է

Այսօր՝ փետրվարի 27-ին, ողբերգական ավտովթար է տեղի ունեցել Արմավիրի մարզում:   

shamshyan.com-ի հաղորդմամբ ժամը 02:30-ի սահմաններում, «Արմավիր» բժշկական կենտրոնի շտապօգնության բժիշկը ահազանգել է ոստիկանության Արմավիրի բաժին և հայտնել, որ Եղեգնուտ գյուղից դեպի Երասխահուն գյուղ տանող ավտոճանապարհին ավտոմեքենա է գլխիվայր շրջվել, և 1 հոգի մահացել է. իսկ 1 հոգու էլ իրենք տեղափոխում են «Արմավիր» բժշկական կենտրոն: 

Ոստիկաններն ու քննիչները պարզել են, որ 42-ամյա Օկսեն Ստեփանյանը Nissan մակնիշի ավտոմեքենայով, Եղեգնուտ գյուղից դեպի Երասխահուն գյուղ տանող ճանապարհին դուրս է եկել ճանապարհի երթևեկելի գոտուց և գլխիվայր շրջվել, ինչի հետևանքով վերջինս տեղում մահացել է, իսկ ուղևոր, Եղեգնուտ գյուղի բնակիչ, 51-ամյա Քալաշ Սմոյանը մարմնական վնասվածքներով տեղափոխվել է «Արմավիր» բժշկական կենտրոն:   

Գ. Շամշյանի տեղեկություններով, Օ. Ստեփանյանը հաշվառված է ՀՀ Արդարադատության քրեակատարողական ծառայության «Սևան» քրեակատարողական հիմնարկում՝ ժողովրդին հայտնի «Սևանի գաղութում»: