«ՔՊ»-ն կրկին մերժեց ՀՌՀ անդամի պաշտոնի ընդդիմադիր թեկնածուին

Ազգային ժողովում փետրվարի 22-ին ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նիստին քննարկեցին Հեռուստատեսության եւ ռադիոյի հանձնաժողովի անդամի թափուր պաշտոնի հերթական թեկնածուին։

Ընդդիմադիր «Հայաստան» խմբակցությունն այս անգամ առաջադրել էր Անժելա Նալբանդյանի թեկնածությունը։

Թեկնածուի կենսագրությունն ու կարիերայի ուղին ներկայացրեց ընդդիմադիր «Հայաստան» խմբակցության պատգամավոր Հռիփսիմե Ստամբուլյանը։ Թեկնածուն մասնագիտությամբ լեզվաբան-երկրաբան է: Նա անկուսակցական է եւ աշխատել է «Արմենիա» հեռուստաալիքում, «ՊանԱրմենիան Մեդիա Գրուպ» ՓԲԸ-ում, «Sputnik Արմենիա» ռադիոկայանում եւ այլն։ Բացի այդ, Նալբանդյանը հիմնադրել է Fortuna Tour ընկերությունը։ 2021 թվականին մասնակցել է խորհրդարանական ընտրություններին եւ առաջադրվել է որպես պատգամավորի թեկնածու։

Թեկնածուն իր ելույթում անդրադարձավ Հայաստանի տարածքում գործող հեռուստառադիոընկերությունների բովանդակությանը եւ որակին։ Նա անդրադարձավ նաեւ հեռուստառադիոընկերությունների նկատմամբ հասարակական դժգոհության պատճառներին, մատնանշեց դրանց բարելավման ուղիներն ու միջոցները։

«Անհրաժեշտ է անընդհատ ուսումնասիրել միջազգային փորձը»,- համոզված է Նալբանդյանը։

Այնուամենայնիվ, նրա թեկնածության վերաբերյալ հանձնաժողովի անդամների դիրքորոշումը, միանշանակ չէր: Իշխող մեծամասնության պատգամավորները չպաշտպանեցին Նալբանդյանի թեկնածությունը։ Արդյունքում, մշտական խորհրդարանական հանձնաժողովը բացասական եզրակացություն տվեց նրա թեկնածության հարցով: