Վլադիմիր Պուտինն ու Իլհամ Ալիևը կստորագրեն «դաշնակցային փոխգործակցության հռչակագիր»

Ռուսաստանի նախագահ Վլադիմիր Պուտինը վաղը կհանդիպի Ադրբեջանի նախագահ Իլհամ Ալիևի հետ. ասվում է Կրեմլի հաղորդագրության մեջ։

Ըստ դրա՝ Վլադիմիր Պուտինն ու Իլհամ Ալիևը նախատեսում են դաշնակցային համագործակցության մասին հռչակագիր ստորագրել։

«Փետրվարի 22-ին ՌԴ նախագահ Վլադիմիր Պուտինը կհանդիպի պաշտոնական այցով Ռուսաստանում գտնվող՝ Ադրբեջանի Հանրապետության նախագահ Իլհամ Ալիևի հետ։ Նախատեսվում է քննարկել երկկողմ հարաբերությունների հետագա զարգացման հարցերի ողջ շրջանակը` քաղաքական, առևտրային, տնտեսական և հումանիտար ոլորտները»,- ասվում է Կրեմլի  զեկույցում։ 

Բացի դրանից՝ կքննարկվի Ռուսաստանի, Ադրբեջանի և Հայաստանի ղեկավարների միջև Լեռնային Ղարաբաղի վերաբերյալ 2020 թվականի նոյեմբերի 9-ին, 2021 թվականի հունվարի 11-ին և  նոյեմբերի 26-ին կնքված համաձայնագրերի իրականացումը, ներառյալ՝ Հարավային Կովկասում տնտեսական և տրանսպորտային կապերի վերականգնման միջոցառումները:

«Բանակցությունների արդյունքների համաձայն՝ դաշնակցային փոխգործակցության մասին հռչակագիր կստորագրվի, որը Ռուսաստանի և Ադրբեջանի միջև հարաբերությունները կհասցնի դաշնակցային մակարդակի»,- ասվում է զեկույցում։