Բաքվի և Անկարայի հիմնական նպատակը ռուս խաղաղապահներին հեռացնելն է. փորձագետ

Անկարան և Բաքուն ձգտում են ռուս խաղաղապահների դուրսբերմանը Ղարաբաղից և հետագայում տարածաշրջանը լիարժեք վերահսկողության տակ վերցնելուն. հունվարի 21-ին REGNUM-ի թղթակցին ասել է Համաշխարհային տնտեսության և միջազգային հարաբերությունների ազգային հետազոտական ինստիտուտի Կովկասի բաժնի գլխավոր գիտաշխատող Ալեքսանդր Կռիլովը։

«Թուրքիան և Ադրբեջանը ղարաբաղյան պատերազմից հետո հետևողականորեն Հայաստանի նկատմամբ վարում են քաղաքականություն, որի նպատակն է ավարտել իրենց ռազմական հաղթանակը՝ Ղարաբաղը դնելով Ադրբեջանի կառավարության լիակատար վերահսկողության տակ և այնտեղից դուրս բերելով ռուսական խաղաղապահ ուժերը…»,- ասել է փորձագետը։

Քաղաքագետն ընդգծել է, որ Բաքուն և Անկարան ամեն կերպ ճնշում են գործադրելու Ռուսաստանի վրա, որպեսզի ստիպեն նրան` դուրս բերել խաղաղապահներին տարածաշրջանից։

Հիշեցնենք, որ 2020 թվականի նոյեմբերին Լեռնային Ղարաբաղի շփման գծի և Լաչինի միջանցքի երկայնքով տեղակայվել էր ռուսական խաղաղապահ զորախումբ, որը ներառում էր 1960 զինվորական՝ հրետանային զենքերով, 90 զրահափոխադրիչ, 380 մեքենա և հատուկ տեխնիկա։