Տոնոյանի եւ մյուսների գործով նիստը հետաձգվել է․ դատավորը պետք է ճշտի՝ սահմանված կարգո՞վ է գործն իրեն մակագրվել, թե ոչ

ՀՀ պաշտպանության նախկին նախարար Դավիթ Տոնոյանի եւ մյուսների գործով դատական նիստը հետաձգվել եւ կվերսկսվի վաղը՝ 11։00-ին։ Այս մասին լրագրողներին հայտնել է գործով մեղադրյալ, ԶՈւ Ավիացիայի վարչության նախկին պետ Ավետիք Մուրադյանի պաշտպան Երեմ Սարգսյանը։

«Դատարանը հարցրեց՝ արդյո՞ք ունենք ինքնաբացարկի միջնորդություն, ասացինք՝ դրան պատասխանելու համար որոշ հանգամանքներ պարզաբանելու անհրաժեշտություն կա, խնդրեցինք հայտնել, թե ինչ կարգով է գործն իրեն մակագրվել, բնականաբար, համակարգչով չի մակագրվել, այլ ձեռքով՝ դատարանի նախագահի կողմից։ Խնդրեցինք նաեւ, որ հայտնի՝ արդյո՞ք տվյալ կա գործում, որ մակագրումն օրենքով սահմանված կարգով է արվել՝ դատավորների ազգանունների այբբենական հաջորդականության կարգով, դատարանն էլ հայտնեց, որ նման տվյալ չկա, ենթադրեց, որ այդպես է։ Ենթադրությունը, սակայն, բավարար չէ դեռ, միջնորդեցինք, որ դատարանը նախագահից պարզի եւ փաստական տվյալ ներկայացնի՝ գործի մակագրման կարգը պահպանվե՞լ է, թե ոչ։ Դատարանը որոշեց միջնորդությունը բավարարել եւ այդ հանգամանքը դատարանի նախագահից պարզել այդ հանգամանքը։ Քանի որ այդ հարցը տվյալ պահին պարզաբանված չէր, դատական նիստը հետաձգվեց, տվյալ կստացվի, ըստ այդմ նիստը կշարունակվի։ Վաղվա պատասխանից պարզ կլինի՝ դատավորին ինքնաբացարկի միջնորդություն հայտնելո՞ւ ենք, թե ոչ, ենթադրաբար հայտնելու ենք, որովհետեւ մեզ համար կարծես թե պարզ է՝ ինչ պատասխան է լինելու։ Կա՛մ ինքնաբացարկի միջնորդություն կլինի, կա՛մ՝ ոչ, որից հետո արդեն ամբաստանյալների խափանման միջոցների փոփոխության հարցը կքննվի»,- հայտնել է փաստաբանը։

Պաշտպանական կողմը համոզված է՝ եթե քրեական գործը տվյալ դատավորին մակագրվել է ոչ թե օրենքով սահմանված կարգով՝ համակարգչով ու ըստ դատավորների ազգանունների այբբենական հերթականության, այլ ձեռքով՝ դատարանի նախագահի կողմից, ապա ողջ դատաքննությունը, անկախ մնացած բոլոր հանգամանքներից, անօրինական է լինելու, քանի որ խախտվելու է դատավորի ընտրության պատահականության սկզբունքը։

Ավելի վաղ հայտնել էինք, որ Երեւանի ընդհանուր իրավասության դատարանում՝ նախագահությամբ դատավոր Մանվել Շահվերդյանի, այսօր՝ հունվարի 19-ին, մեկնարկեց ՀՀ պաշտպանության նախկին նախարար Դավիթ Տոնոյանի, ՀՀ ԶՈՒ ԳՇ պետ Արտակ Դավթյանի, ԶՈՒ ԳՇ պետի նախկին տեղակալ Ստեփան Գալստյանի, զենքի մատակարարմամբ զբաղվող գործարար Դավիթ Գալստյանի՝ «Պատրոն Դավո»-ի եւ մյուսների գործով դատական նիստը։

Հիշեցնենք՝ ՀՀ ԱԱԾ քննչական դեպարտամենտում քննված քրեական գործով կատարված նախաքննությամբ պարզվել է, որ ՀՀ ԶՈւ եւ ՀՀ ՊՆ բարձրաստիճան պաշտոնատար անձինք, չարաշահելով իրենց պաշտոնեական դիրքը, «Մոսթոն Ինժիներինգ» ընկերության սեփականատիրոջ հետ նախնական համաձայնությամբ, «Նեյտրոն ԳԱՄ» եւ «Բագավան» ՓԲ ընկերությունների մասնավորեցումից ընկերության կողմից ՀՀ պաշտպանության նախարարության հանդեպ ունեցած պարտավորությունը մարելու նպատակով, 2018թ. ընկերությունից ընդունել՝ ձեռք են բերել թվով 4232 հատ ժամկետանց, տեխնիկական պահանջներին չհամապատասխանելու պատճառաբանությամբ նախկինում չընդունված եւ ՀՀ ՊՆ-ում պահեստավորված ռազմամթերքը։ Պարզվել է նաեւ, որ վերը նշված անձինք ռազմամթերքի ձեռքբերման պայմանագրի կնքման համար առկա խոչընդոտները վերացնելու եւ իրենց գործողություններին օրինական տեսք տալու համար պայմանագրի մաս կազմող տեխնիկական բնութագիրը համապատասխանեցրել են փաստացի ՊՆ-ում ի պահ հանձնված ապրանքի տվյալ տեսակին՝ դրանում նշելով ռազմամթերքը գործարանային արկղերով ՀՀ ՊՆ N զորամասի կենտրոնական պահեստ մատակարարելու վերաբերյալ իրականությանը չհամապատասխանող տվյալներ։ Ընդ որում՝ նշված ռազմաթերքը ձեռք է բերվել նույն խմբաքանակից ռազմամթերքի նախկինում ձեռքբերման արժեքից գրեթե կրկնակի թանկ գնով՝ կատարելով առանձնապես խոշոր չափերով՝ 2,277,323,840 ՀՀ դրամին համարժեք, 4.655.200 ԱՄՆ դոլար գումարի հափշտակություն։

Նշված քրեական գործն ըստ մեղադրանքի` Դավիթ Էդգարի Տոնոյանի՝ ՀՀ քրեական օրենսգրքի 179-րդ հոդվածի 3-րդ մասի 1-ին կետով, Արտակ Մաթեւոսի Դավթյանի՝ ՀՀ քրեական օրենսգրքի 375-րդ հոդվածի 3-րդ մասով, Ստեփան Ռոբերտի Գալստյանի՝ ՀՀ քրեական օրենսգրքի 375-րդ հոդվածի 3-րդ մասով եւ 314-րդ հոդվածի 1-ին մասով, Ավետիկ Վալոդյայի Մուրադյանի՝ ՀՀ քրեական օրենսգրքի 375-րդ հոդվածի 3-րդ մասով եւ 314-րդ հոդվածի 1-ին մասով, Վլադիմիր Արտաշի Բաբայանի՝ ՀՀ քրեական օրենսգրքի 375-րդ հոդվածի 3-րդ մասով եւ 314-րդ հոդվածի 1-ին մասով, Արտյոմ Եգորի Համբարյանի՝ ՀՀ քրեական օրենսգրքի 375-րդ հոդվածի 3-րդ մասով եւ 314-րդ հոդվածի 1-ին մասով, Դավիթ Վարազդատի Գալստյանի՝ ՀՀ քրեական օրենսգրքի 178-րդ հոդվածի 3-րդ մասի 1-ին կետով եւ 325-րդ հոդվածի 1-ին մասով։

Բարձրաստիճան նախկին եւ ներկա պաշտոնյաներն իրենց առաջադրված մեղադրանքը չեն ընդունում, համարում են այն շինծու քրեական գործ։

Նրանք պահանջում էին նախաքննության ընթացքում հրթիռները փորձարկելու միջոցով հիմնավորել դրանց՝ անպիտան լինելը։ Մինչդեռ ԱԱԾ-ն որտեղ քննվել է այս գործը, հրաժարվել է մի շարք փորձաքննություններից, ինչը փաստաբանները կասկածելի են համարում։

Նշենք, որ Դավիթ Տոնոյանը կալանքի տակ գտնվելու ընթացքում պարբերաբար հանդես է գալիս հայտարարություններով։ Նա ակնարկում է, որ տիրապետում է պետական գաղտնիքների, ինչը ընկալվում է որպես դրանք հրապարակելու սպառնալիք՝ ուղղված իշխանություններին։

Նրա փաստաբանները տարածած վերջին հայտարարությունում նշել են, որ ԱԱԾ-ն եւ տարբեր շրջանակներ այս քրեական գործը փորձել են արհեստականորեն կապել 44-օրյա պատերազմի հետ։ Ըստ փաստաբանների՝ Տոնոյանն անհրաժեշտ է համարում, որ քրեական գործի հրապարակային քննությամբ պարզվի եւ հերքվի նաեւ այդ հանգամանքը։