Թուրքիան աջակցում է Վրաստանի մասնակցությանը տարածաշրջանում խաղաղության ապահովման գործին

Թուրքիան աջակցում է Վրաստանի մասնակցությանը կովկասյան տարածաշրջանում կայունության շուրջ ընթացող քննարկումներին։ Այս մասին հայտնում է Sabah թերթը՝ հղում անելով դիվանագիտական աղբյուրներին։

Վրաստանը չի մասնակցել անցյալ ամիս Մոսկվայում կայացած 3+3 հանդիպմանը։ Սակայն վրացի պաշտոնյաները նշել են, որ երկիրն աջակցում է տարածաշրջանում հարաբերությունների և համագործակցության ամրապնդմանը հարևան այլ երկրների հետ և արդյունավետ քայլեր է ձեռնարկել Թուրքիայի, Ադրբեջանի և Հայաստանի հետ՝ տարածաշրջանում կայուն խաղաղություն ապահովելու համար։

Անկարան հաճախ կոչ էր անում ստեղծել վեց երկրներից կազմված պլատֆորմ՝ Թուրքիա, Ռուսաստան, Իրան և Հայաստան, Վրաստան ու Ադրբեջան, տարածաշրջանում մշտական խաղաղության, կայունության և համագործակցության համար՝ այն բնութագրելով որպես շահեկան նախաձեռնություն տարածաշրջանների բոլոր խաղացողների համար: