Սիրիայում հայտնել են թուրքական զորքերի նոր համալրման մասին

Մարդու իրավունքների սիրիական դիտորդական կենտրոնը (SOHR) հայտնել է Իդլիբի հյուսիսային շրջաններում գտնվող Քաֆր անցակետով թուրքական զինուժի համալրման մասին: Համալրումները ներառել են վառելիքով բեռնատարներ, պարենամթերք, ռազմական տեխնիկա և տասը ռազմական զրահամեքենա՝ 250 զինվորով:

Նոյեմբերի 4-ին SOHR-ը փաստել էր թուրքական ուժերի ժամանումը Իդլիբի հյուսիսային Քաֆր անցակետով դեպի «Պուտին-Էրդողան» տարածք (Իդլիբի շրջան): Ավտոշարասյունը բաղկացած է եղել մի քանի տասնյակ թուրքական ռազմական մեքենաներից, որոնցում եղել է ավելի քան 300 թուրք զինվոր։

SOHR-ը նշել է, որ թուրքական ուժերն ավելի քան մեկ տարով դադարեցրել են զինվորների արձակուրդները՝ մեծ ռազմական տեղակայման և նահանգում անցակետեր ստեղծելու նախապատրաստման պատճառով։