Վարորդի ինքնազգացողությունը վատացել է մեքենա վարելիս. նա հիվանդանոցում մահացել է

Այսօր ողբերգական դեպք է տեղի ունեցել Երևանում: Այս մասին հայտնում է shamshyan.com-ը:

Ժամը 12:30-ի սահմաններում Օpel մակնիշի ավտոմեքենայի վարորդը, ում ինքնազգացողությունը ավտոմեքենան վարելիս վատացել է, ըստ նախնական տեղեկությունների, ժողովրդին հայտնի «Երեքնուկ» կամրջի վրա բախվել է Nissan X-Trail մակնիշի ավտոմեքենային, մի քանի մետր առաջ ընթացել  և կանգնել:

Օpel-ի վարորդին օպերատիվորեն ժամանած շտապօգնության բժիշկներն ու ՀՀ ոստիկանության պարեկային ծառայության Երևանի գնդի 1-ին գումարտակի 3-րդ վաշտի պարեկները՝ գնդի հրամանատարի տեղակալ Անդրանիկ Իսախանյանի, գումարտակի հրամանատար Արամ Դադոյանի և վաշտի հրամանատար Գևորգ Թորոսյանի գլխավորությամբ, անհրաժեշտ օգնությունն են ցուցաբերել:

Մինչ տեղում   ուժեղացված  ծառայություն էին կատարում պարեկներ Գոռ Հովհաննիսյանն ու Վարազդատ Աթանյանը, հիվանդանոցից ահազանգ է ստացվում պարեկային ծառայության Երևանի գունդ, որ Օpel-ի վարորդը  հիվանդանոցում մահացել է:

Դեպքի վայրից Nissan X-Trail –ի վարորդը նույնպես բժիշկների  կողմից տեղում առաջին բուժօգնությունն է ստացել, ապա տեղափոխվել «Աստղիկ» բժշկական կենտրոն:

Փաստի առթիվ Վ. Մարգարյանի կողմից նյութեր են նախապատրաստվում: Ոստիկանությունն ու քննչական բաժինը պարզում են Opel-ի մահացած վարորդի  և  հիվանդանոց տեղափոխված Nissan X-Trail –ի վարորդի ինքնությունը: Օպերատիվորեն ժամանել են նաև ապահովագրական ընկերությունների ներկայացուցիչները: