Պուտինը կոչ է արել զարգացնել անօդաչու ռազմական ավիացիան

Ռուսաստանի նախագահ Վլադիմիր Պուտինը կոչ է արել շարունակել զարգացնել անօդաչու ավիացիան։

«Անօդաչու թռչող սարքերը (ԱԹՍ) իրենց հատկապես լավ են դրսևորել վերջին տարիների զինված հակամարտություններում»,- ասել է Պուտինը Սոչիում պաշտպանության նախարարության և Ռուսաստանի պաշտպանական արդյունաբերության ներկայացուցիչների հետ հանդիպման ժամանակ։

Նա խորհուրդ է տվել առավել լայնորեն կիրառել անօդաչու թռչող սարքերի մարտական փորձարկումների ընթացքում ձեռք բերված սեփական փորձը, ինչպես նաև վերլուծական տվյալները։

Պուտինն ասել է, որ ռուսաստանցի զինվորականները սովորել են, թե ինչպես արդյունավետ կերպով հետ մղել անօդաչու սարքերի հարձակումները:

«Մենք շատ լավ գիտենք, թե ինչպես են դրանք իրենց ցուցաբերել վերջին տարիներին զինված հակամարտություններում, որքան արդյունավետ և որքան վտանգավոր կարող են լինել մեզ համար՝ նկատի ունենալով այն, ինչ տեսանք Սիրիայում՝ անօդաչու թռչող սարքերի կիրառմամբ ահաբեկչական հարձակումների ժամանակ»,- բացատրել է պետության ղեկավարը։

Պուտինը նաև պարզաբանել է, որ ավելի քան երկու հազար անօդաչու թռչող սարքեր ներկայումս ծառայում են ռուսական բանակին։