Թալիբները կրակել են հարսանիքի հյուրերի վրա կենդանի երաժշտության պատճառով

Աֆղանստանի ԶԼՄ-ները, հղում անելով պաշտոնական մարմիններին և ականատեսներին, հայտնում են, որ թալիբ գրոհայինները կրակ են բացել աֆղանական հարսանիքի արարողության ժամանակ կենդանի երաժշտություն հնչելու պատճառով: Միջադեպի հետևանքով զոհվել է առնվազն երկու մարդ։

Հարձակման զոհերի հարազատները հայտնել են, որ Աֆղանստանի հյուսիսում գտնվող Սուրխուդ քաղաքում թալիբները կրակ են բացել հարսանյաց հյուրերի վրա կենդանի աֆղանական երաժշտության կատարման պատճառով, ինչի հետևանքով զոհվել է երկու մարդ, ևս երկուսը վիրավորվել են։

Թալիբների ներկայացուցիչը չի հաստատել տեղեկությունը, սակայն ասել է, որ թալիբները համաձայն չեն նման գործողությունների հետ:

Զաբիուլլահ Մուջահիդն ասել է. «Միջադեպի հետաքննությունը շարունակվում է, և մենք չգիտենք, թե ինչպես է դա տեղի ունեցել»: Նրա խոսքով՝ միջադեպի պատճառ կարող էին լինել անձնական դրդապատճառները։

Թալիբների ներկայացուցիչը նշել է, որ Իսլամական Էմիրությունում ոչ ոք իրավունք չունի խանգարելու երաժշտություն կամ այլ բան լսողին։

«Եթե ինչ-որ մեկը սպանում է ինչ-որ մեկին, նույնիսկ եթե նա թալիբ է, դա հանցագործություն է, և նա պատասխանատվության կենթարկվի», - եզրափակել է Զաբիուլլա Մուջահիդը։