Հայտնի է դարձել, թե երբ Իրանը կվերադառնա միջուկային բանակցություններին

Իրանը մոտ օրերս կվերադառնա ԵՄ-ի ու ԱՄՆ-ի հետ բանակցություններին:

Իրանը և Եվրամիությունը (ԵՄ) հինգշաբթի պայմանավորվել են Բրյուսելում շարունակել երկխոսությունը՝ ուղղված Իսլամական Հանրապետության և համաշխարհային տերությունների միջև 2015 թվականին կնքված միջուկային գործարքի շուրջ բանակցությունների վերսկսմանը:

ԵՄ ներկայացուցիչը, որին հանձնարարվել է համակարգել իրանական միջուկային գործարքի վերաբացման շուրջ բանակցությունները, Էնրիկե Մորան է։ Ննա հինգշաբթի այցելել է Թեհրան և մի քանի ժամ զրուցել Իրանի փոխարտգործնախարար Ալի Բաղերիի հետ:

«Հանդիպման ավարտին կողմերը պայմանավորվեցին առաջիկա օրերին Բրյուսելում շարունակել երկկողմ հետաքրքրություն ներկայացնող հարցերի շուրջ երկխոսությունը»,- ասվում է Իրանի ԱԳՆ հայտարարության մեջ, որում նշվում է, որ Մորան ասել է, որ ԵՄ-ն «պատրաստ է համագործակցել Իրանի և այլ կողմերի հետ»:

Իրանն աստիճանաբար նվազեցնում է 2015 թվականի միջուկային համաձայնագրի կատարումը, որը կնքել էր համաշխարհային տերությունների հետ՝ ի պատասխան ԱՄՆ նախկին նախագահ Դոնալդ Թրամփի՝ 2018 թվականի մայիսին համաձայնագրից դուրս գալուն: