Էրդողանն ու Բայդենը կքննարկեն նաև Հարավային Կովկասում ստեղծված իրավիճակը

Թուրքիայի նախագահ Ռեջեփ Թայիփ Էրդողանը Հարավային Կովկասում տիրող իրավիճակը կքննարկի ամերիկյան վարչակազմի ղեկավար Ջո Բայդենի հետ: Այս մասին Milliyet թերթին տված հարցազրույցում ասել է Թուրքիայի նախագահի մամուլի քարտուղար Իբրահիմ Քալընը:

Նշելով Թուրքիայի և ԱՄՆ-ի միջև լայն համագործակցությունը՝ Քալընը պատմել է, թե ինչ հարցեր են քննարկելու Էրդողանն ու Բայդենը G-20-ի պետությունների առաջնորդների հանդիպման ժամանակ, որը տեղի կունենա հոկտեմբերի 30-31-ը Հռոմում: Օրակարգում այնպիսի առանցքային հարցեր են, ինչպիսիք են քաղաքական, տնտեսական, էներգետիկ անվտանգություն, ահաբեկչության դեմ պայքար, առևտուր, պաշտպանական արդյունաբերություն, Աֆղանստան, Սիրիա, Իրաք, Ղարաբաղ, Կովկաս, Լիբիա, Միջերկրական ծով և այլ տարածաշրջաններ:

«Մենք ցանկանում ենք, որ երկու ռազմավարական գործընկերներն ու դաշնակիցները լուծեն խնդիրները այս սահմանումներին համապատասխան և դրական օրակարգով, մեկ քայլ առաջ գնան այն հարցերում, որոնց շուրջ մենք համաձայն ենք, և լուծեն այն հարցերը, որոնց շուրջ կան տարաձայնություններ՝ բանակցությունների և երկխոսության միջոցով»,- հավելել է Քալընը: