Փանջշիրում թալիբները կրում են մեծ կորուստներ և կորցնում վերահսկողությունը տարածքների նկատմամբ

Աֆղանստանի ազգային դիմադրության ճակատը հայտնում է, որ իր վերահսկողության տակ է վերցրել Չարիքար քաղաքը՝ Փարվան նահանգի կենտրոնը՝ Քաբուլից հյուսիս։ Փանջշիրում տեղի ունեցած մարտերի արդյունքում թալիբները մեծ վնասներ են կրել. հաղորդում է «Ինտերֆաքսը»:

Ճակատի ներկայացուցիչները Twitter-ում գրել են, որ անցած գիշեր թալիբները շարունակել են հարձակումը Փանջշիրի հովտի վրա մի քանի ուղղություններից։ Նրանց խոսքով՝ թալիբները, նախքան հարձակումը սկսելը, ստիպել են ընկերություններին անջատել Փանջշերի կապի և ինտերնետի ծառայությունները, ինչպես նաև էլեկտրաէներգիայի մատակարարումը:

Բոլոր երեք ուղղություններում, ըստ Twitter-ի հաղորդագրության, թալիբները կրել են մեծ կորուստներ, տասնյակ զինյալների մարմիններ մնում են մարտի դաշտում: Մի քանի տասնյակ զինյալ անձնատուր են եղել, ճակատի զինվորների թվում նույնպես կան կորուստներ:

Հաղորդվում է նաև, որ  հակաթալիբանական ճակատը ղեկավարող Ահմադ Մասուդի կողմնակիցներին հաջողվել է «Թալիբան»-ից հետ վերցնել Բադախշան նահանգի չորս շրջան: