50․000 դոլարի օժանդակություն՝ զոհվածների ընտանիքներին․ Արեւմտյան Ամերիկայի թեմի առաջնորդ Թորգոմ սրբազանի հերթական աջակցությունը

Հայ Առաքելական եկեղեցու Հյուսիսային Ամերիկայի Արեւմտյան թեմի առաջնորդ Թորգոմ եպիսկոպոս Տոնոյանն այսօր «Մեծն Ներսես» բարեսիրական կազմակերպության միջոցով հերթական դրամական օժանդակությունը ցուցաբերեց Արցախյան պատերազմում զոհված ազատամարտիկների շուրջ 100 ընտանիքների։

Yerkir.am-ի հետ զրույցում «Մեծն Ներսես» բարեգործական կազմակերպության տնօրեն Տիգրան Գալստյանը հայտնեց, որ գրասենյակը 1993 թվականից  բազմաթիվ բարեգործական ծրագրեր է իրականացնում՝ հիմնականում աջակցելով զոհված ազատամարտիկների երեխաներին՝ մինչեւ չափահաս դառնալը, իսկ այն երեխաները, որոնք ընդունվում են պետական ուսումնական հաստատություններ, աջակցություն են ստանում մինչեւ բուհն ավարտելը։

«Վերջին պատերազմի ժամանակ հազարավոր հայրենակիցներ են զոհվել, շուրջ հազարից ավելի անչափահաս երեխաներ ունեցող՝ զոհվածների ընտանիքներ կան, նրանցից շուրջ 300 հոգի ներառվել է աջակցության ծրագրերում։ Մինչեւ տարեվերջ բոլոր անչափահաս երեխաներին կգրանցենք, որպեսզի ամենամսյա դրամական օժանդակություն տանք։ Այս պահին մեզ հյուրընկալվել է Հյուսիսային Ամերիկայի արեւմտյան թեմի առաջնորդ Թորգոմ եպիսկոպոս Տոնոյանը։ Սա նրա առաջին հովվական այցն է Հայաստան։ Սրբազան հայրը մոտ 100 ընտանիքի աջակցություն կցուցաբերի եւ իր օրհնության խոսքը կասի»,- ասաց Գալստյանը։

Այս օրերին սրբազան հայրն արդեն շուրջ 70 ընտանիքի դրամական աջակցություն է ցուցաբերել։ Զոհված հերոսների ընտանիքների մեկ այլ խումբ էլ վաղը աջակցություն կստանա՝ Պռոշյանի պանթեոնում։ «Սրբազան հայրը, մինչ այս, ԱՄՆ-ից մոտ 50 հազար դոլարի օժանդակություն արդեն ցուցաբերել է, սա երկրորդ՝ 50 հազար դոլարի օժանդակությունն է։ Եպիսկոպոսն անձամբ է եկել՝ ընտանիքների հետ հանդիպելու։ Յուրաքանչյուր ընտանիք 500 դոլար աջակցություն կստանա»,- հավելեց Գալստյանը։

«Հատուկ առաքելությամբ եմ եկել Հայաստան։ Նախորդ ամիսների ընթացքում մեր ազգային առաջնորդարանում որոշեցինք նահատակների անուններով հիմնադրամ բացել եւ ժողովրդի մտածումները կենտրոնացնել այդ ֆոնդի վրա։ Գումար հավաքվեց, շատ բարերարներ իրենց աջակցությունը ցուցաբերեցին հիմնադրամին»,- մեզ հետ զրույցում ասաց Թորգոմ եպիսկոպոս Տոնոյանը։

Լիանա Սարգսյան

Մանրամասները դիտեք տեսանյութում։