ԱՄՆ սենատորները Բայդենին հորդորել են պատժամիջոցներ կիրառել Թուրքիայի դեմ՝ Հյուսիսային Կիպրոսի վերաբերյալ ծրագրերի հետ կապված

ԱՄՆ մի խումբ սենատորներ նամակ են հղել նախագահ Ջո Բայդենին՝ խնդրելով ճնշում գործադրել Թուրքիայի վրա և պատժամիջոցներ կիրառել։

Թուրքերը ցանկանում են վերաբացել ցանկապատված Վարոշա քաղաքը (թուրքական անունն է Մարաշ)`ինքնահռչակ Հյուսիսային Կիպրոսի թուրքական հանրապետության օկուպացիայի ներքո: Երբեմնի խոշոր տուրիստական կենտրոնն այժմ դարձել է քաղաք–ուրվական․ թուրքական օկուպացիայի տակ հայտնվելուց հետո այն թալանվել էր թուրքերի կողմից։

Այս կապակցությամբ Բայդենին նամակ են հղել ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսը, դեմոկրատ Քրիս Վան Հոլլենը և հանրապետական Մարկո Ռուբիոն:

«Մենք Եվրամիությանը կոչ ենք անում նախապես պարզաբանել, որ Թուրքիայի կողմից Վարոշան բացելու կամ վերաբնակեցնելու ցանկացած փորձի դեպքում բազմակողմ պատժամիջոցներ կսահմանվեն», - ասվում է նամակում:

Սենատորներն նշել են, որ Թուրքիան անտեսում է Եվրախորհրդարանի և ՄԱԿ-ի կոչերն այս հարցում:

Միևնույն ժամանակ, ԱՄՆ 11 սենատորներ հայտարարություն են տարածել, որում քննադատել են թուրքական կողմի ծրագրերը և կոչ արել Ջո Բայդենին՝ կիրառել Թուրքիայի վրա ճնշման իր բոլոր լծակներն ու կանխել Անկարայի անօրինական ծրագրերը:

Թուրքական աղբյուրը նշում է, որ այս նամակն ուղարկվել է Էրդողանի՝ Հյուսիսային Կիպրոս այցից առաջ: