ԵՄ առաջնորդները մերժել են Մերկելի ու Մակրոնի՝ Պուտինի հետ գագաթնաժողով անցկացնելու առաջարկը

Գերմանիայի կանցլեր Անգելա Մերկելը հայտարարել է, որ Եվրամիության և Ռուսաստանի միջև գագաթնաժողովի կազմակերպման մասին պայմանավորվածություն ձեռք չի բերվել: Նա ասել է, որ դժգոհ է այս հարցում գործընկերների անհամարձակությունից. հայտնում է Bloomberg-ը:

Մերկելը հայտարարել է, որ ԵՄ-ի և Ռուսաստանի միջև հնարավոր գագաթնաժողովի մասին քննարկումը «բարդ» է եղել: Նրա խոսքով՝ Բրյուսելում ղեկավարները կրկին քննարկել են, թե ինչ պայմաններում են պատրաստ աշխատել և սերտորեն համագործակցել Ռուսաստանի հետ: Այնուամենայնիվ, Մերկելը խոստովանել է, որ հույսը դրել էր իր եվրոպացի գործընկերների մեծ խիզախության վրա:

Ավելի վաղ հայտնի էր դարձել, որ Եվրամիությունը մերժել է Պուտինին ԵՄ երկրների ղեկավարների հետ հանդիպմանը հրավիրելու գաղափարը: Բացի դրանից՝ ԵՄ պետությունների և կառավարությունների ղեկավարները Բրյուսելի գագաթնաժողովում ԵՄ արտաքին գերատեսչությանը՝ Ժոզեպ Բորելի գլխավորությամբ, հանձնարարել են ուսումնասիրել Ռուսաստանի դեմ նոր պատժամիջոցներ սահմանելու հնարավորությունը:

Պուտինի հետ հանդիպելու նախաձեռնությունը Գերմանիայի կանցլեր Անգելա Մերկելը և Ֆրանսիայի նախագահ Էմանուել Մակրոնը առաջ էին քաշել հունիսի 23-ին: