Իրանի նախագահի պաշտոնի երեք թեկնածու հրաժարվել է մասնակցել ընտրություններին

Իրանի Իսլամական Հանրապետության ղեկավարի ներկայացուցիչը Ազգային անվտանգության գերագույն խորհրդում՝ Սայիդ Ջալիլին, որոշել է հետ վերցնել իր թեկնածությունը նախագահական ընտրություններից. հայտնում է «Ինտերֆաքս»-ը՝ վկայակոչելով իրանական լրատվամիջոցներ:

Իր հայտարարության մեջ Ջալիլին նշել է, որ հրաժարվում է մասնակցությունից մեկ այլ թեկնածուի՝ մրցավազքի ֆավորիտ Իբրահիմ Ռայիսիի օգտին:

Ընտրություններին չմասնակցելու որոշման մասին ավելի վաղ հայտարարել էին պահպանողական պատգամավոր Ալիռեզա Զականին, ինչպես նաև բարեփոխումների թեկնածու Մոհսեն Մեհրալիզադեն: Այսպիսով՝ նախագահի պաշտոնի համար կպայքարի չորս թեկնածու:

Իրանում նախագահական ընտրությունները տեղի կունենան ուրբաթ՝ հունիսի 18-ին: Ըստ Press TV-ի՝ Ռայիսիի օգտին պատրաստ է քվեարկել ընտրողների 55,6% -ը, իսկ Մոհսեն Ռեզային՝ 5,5% -ը: Ընտրողների 23%-ը դեռ չի կողմնորոշվել ընտրության հարցում:

Իրանի նախագահն ընտրվում է չորս տարի ժամկետով: Հաղթելու համար թեկնածուն պետք է հավաքի առնվազն 50% գումարած մեկ ձայն: