Սպաները դատերում հաղթել են, գոյացել է մոտ 150 մլն դոլարի պարտք, իսկ Կառավարությունը հրաժարվում է վճարել. Բագրատյան

Պահեստազորի զինծառայողները, ԱԻՆ, ոստիկանության սպաները արձակուրդայինների վճարման հարցով դատերում հաղթել են, գոյացել է մոտ 150 մլն դոլարի պարտք, իսկ Կառավարությունը հրաժարվում է դրանք վճարել։ Այս մասին ֆեյսբուքյան իր էջում գրել է ՀՀ նախկին վարչապետ, տնտեսագետ Հրանտ Բագրատյանը:

«Նիկոլական Հայաստանը դարձել է մի քաոտիկ իրողություն։ Ինչպես գիտեք կառավարությունը խնդիրներ ունի պահեստազորի զինծառայողների, ԱԻՆ, պետանվտանգության, ոստիկանության սպաների արձակուրդայինների վճարման հետ։ Խնդիրը կարգավորելու համար Ցոլակ Խաչատրյանի գլխավորությամբ ստեղծված էր նախաձեռնություն։ Մարդիկ բոլոր դատերում հաղթել են։ Գոյացել է մոտ 150 մլն դոլարի պարտք։ Կառավարությունը, ՊՆ-ն, մյուս գերատեսչությունները հրաժարվում են այդ պարտքերը վճարել։ Մայոր Խաչատրյանը սեպտեմբերյան պատերազմի ժամանակ հերոսաբար զոհվեց Ջեբրաիլում։ Ներկայումս նախաձեռնության աշխատանքները շարունակում է  համակարգել պահեստազորի մայոր  Էդգար Հովհաննիսյանը։ Առայժմ արդյունք չկա։ Է ի՞նչպես վճարեն օրինական պարտքերը, եթե իմքայլականներին պարգեւավճարի գումարները չեն հերիքում։

Հ.Գ. Առաջիկայում գրելու ենք նաեւ ավտոներկրողների ԱԱՀ պարտքի մասին։ 2018 եւ 2019թթ բյուջե փող մուտքագրեցին։ Բա ԱԱՀ-ը ո՞վ պետք է հետ տա։ Ազատություն կուսակցությունն այս պարտքերը ի գիտություն է ընդունում։ Դրանք պետք է ներառվեն պետության պարտքի մեջ եւ կարճ ժամկետներում վճարվեն»,- գրել է նա։