ԱՄՆ-ը վերաբացելու է Երուսաղեմում պաղեստինցիների հյուպատոսությունը

ԱՄՆ-ը վերաբացելու է Երուսաղեմում ամերիկյան հյուպատոսությունը, որը պատասխանատու է Միացյալ Նահանգների և Պաղեստինի հարաբերությունների համար: Այս մասին Ռամալահում Պաղեստինի նախագահ Մահմուդ Աբասի հետ հանդիպման ժամանակ հայտնել է պետքարտուղար Էնթոնի Բլինքենը:

«Մենք կշարունակենք դեմ լինել միակողմանի պրակտիկայի ցանկացած ձևի, որը բռնության կհանգեցնի Իսրայելի և պաղեստինցիների միջև», - ասել է ԱՄՆ դիվանագիտության ղեկավարը, որը Պաղեստին է ժամանել պաշտոնական այցով՝ Մերձավոր Արևելք շրջագայության շրջանակներում:

Պաղեստինի առաջնորդի հետ բանակցություններից հետո Բլինքենն ասել է, որ Վաշինգտոնն անհապաղ ֆինանսական օգնություն կտրամադրի Գազայի հատվածին՝ 5,5 միլիոն ԱՄՆ դոլարի չափով: Եվս 32 միլիոն դոլար կհատկացվի անկլավում գործող միջազգային մարդասիրական կազմակերպություններին:

Բլինքենը Ռամալահ է ժամանել Թել Ավիվից, որտեղ հանդիպել է Իսրայելի վարչապետ Բինյամին Նեթանյահուի հետ:

Ռամալահ այցելելուց հետո ԱՄՆ պետքարտուղարը պետք է մեկնի Կահիրե՝ Եգիպտոսի նախագահ Աբդել Ֆաթահ ալ Սիսիի և արտգործնախարար Սամեհ Շուքրիի հետ բանակցելու:

Բլինքենի՝ Մերձավոր Արևելքում վերջնական նպատակակետը կլինի Ամմանը, որտեղ նա կհանդիպի Հորդանանի թագավոր Աբդուլլահ Երկրորդի և արտաքին գործերի նախարար Այման Սաֆադիի հետ: