Տղերք միջանցքի առումով խնդիրը նախևառաջ Արմեն Սարգսյանինն է. բա Սյունիքում սրան ինչի՞ չէիք դավաճան անվանում. Հրանտ Բագրատյան

Ալիևն անընդհատ ասում է. բացեք Սյունիքով միջանցք դեպի Նախիջևան, թե չէ ես կբացեմ։ Այս մասին Facebook-ի իր էջում գրել է նախկին վարչապետ Հրանտ Բագրատյանը:

Նա, մասնավորապես, նշել է. «Մերոնք մինչև հիմա չեն պատասխանում։ Չեն ասում ի՞նչ միջանք, ի՞նչ բան։ Նոյեմբերի 9-ի փաստաթղթում խոսվում է սոսկ կոմունիկացիաներ (իմա՝ ճանապարհներ) տրամադրելու մասին։ Միջանցքը սոսկ ճանապարհ չէ, միջանցքում էքստերիտորիալության սկսզբունք կա։ Ու հանկարծ այսօր մամուլից իմանում եմ, որ Փաշինյանն էլ Ալիևի նման Սյունիքում մերձավորների շրջապատում հայտնել է, չենք ուզում միջանցքը կամավոր տալ, ուժով կվերցնեն։ Իա՛։

Ու արդարացիորեն Փաշինյանին անվանում են կապիտուլյանտ ու դավաճան, ընդվզում են։ Բայց սիրելի սյունեցիներ այդ նույն բառերով ինչո՞ւ Արմեն Սարգսյանին չդիմավորեցիք։ Սահմանադրության 123-րդ հոդվածի 2-րդ կետով նա սահմանադրական կարգի պահպանման երաշխավորն է։ Նույն Սահմանադրության 205-րդ հոդվածի 1-ին մասով ՀՀ տարածքային փոփոխություններն արվում են հանրաքվեով։ Իսկ մինչ այդ 168-ի 2-րդ մասով նման հանրաքվեի վերաբերյալ եզրակացություն պետք է տա Սահմանադրական դատարանը։

Տղերք ուրեմն միջանցքի առումով խնդիրը նախևառաջ Նախագահինն է՝ Արմեն Սարգսյանինը։ Բա Սյունիքում սրան ինչի՞ չէիք դավաճան անվանում։ Սա նիկոլի խնդիրը չէ է, այլ Արմենինը։ Այն մարդու, որը 2012-ի փետրվարին թուղթ է ստորագրել՝ դավաճանաբար կոչ անելով Էրդողանին գալ Հվ Կովկաս և լուծել ղարաբաղյան հակամարտությունը։ Սյունեցիներ դուք սա չգիտե՞ք։ Կամ 17-ը երեկ չէ մյուս օրը դատախազության դիմաց միտինգի ժամանակ ինչո՞ւ Արմենի անունը չի տալիս։ Մենք 2 դավաճան ու կապիտուլյանտ ունենք։ Եվ դրանցից հիմնականը ՀՀ Նախագահի աթոռը զբաղեցրած Արմեն Սարգսյանն է։

p.s. Այսօր ապրիլի 24-ն է։ Բոլորս աղոթում ենք մեր զոհերի համար։ Անչափելի է երթի դուրս եկած մեր հայրենակիցների թիվը։ Լավ է։ Բայց եկեք թոթափենք մեր վրայից ամեն անգամ զոհվածների հետևից լացելը։ Վաղը Սյունիքը չի լինելու։ Արցախը համարյա թե չկա։ Եվ ուրեմն այս նույն ինտենսիվությամբ եկեք 1 ժամով հավաքվենք նախագահականի դիմաց դուրս վռնդենք Արմենին և ապա իջնենք հրապարակ և իշխանությունից հեռացնենք մյուս կապիտուլյանտին։ Այ սրանով մենք կհարգենք 1915-ի, 1988-ի, 2020-ի զոհերի հիշատակը»: