Ռուսաստանն ու Թուրքիան համաձայնության են եկել վերաբացել անցակետերը Իդլիբում և Հալեպում

Ռուսաստանը Թուրքիային առաջարկել է մարտի 25-ից վերսկսել Իդլիբում և Հալեպում գործող մի քանի անցակետերի շահագործումը: Այս մասին երեքշաբթի՝ մարտի 23-ին, հայտարարել է Սիրիայում պատերազմող կողմերի հաշտեցման կենտրոնի ղեկավարի տեղակալ, փոխծովակալ Ալեքսանդր Կարպովը:

«Թուրքիայի զինված ուժերի կողմից վերահսկվող Սիրիայի Արաբական Հանրապետության տարածքներում մարդասիրական ծանր իրավիճակի հետ կապված՝ Պատերազմող կողմերի հաշտեցման ռուսական կենտրոնը թուրքական կողմին առաջարկներ է ուղարկել Իդլիբում գտնվող «Սերաոքաբ» և «Միզնազ» և Հալեպի նահանգի Ալ Բաբ բնակավայրի մոտ գտնվող  Աբու Զեյդին անցակետը վերաբացելու վերաբերյալ»,- ասել է նա:

Կարպովը հավելել է, որ առաջարկվում է մարտի 25-ից սկսել մարդասիրական բեռների առաքումն ու փախստականների ելքը:

Օրեր առաջ հայտնի էր դարձել, որ սիրիական Հալեպում առնվազն երկու խաղաղ բնակիչ է զոհվել այն բանից հետո, երբ ահաբեկիչները կրակ էին բացել Ալ Սալիհին և Ալ Ֆիրդաուս շրջանների վրա:

Բացի այդ՝ մարտի 19-ին Սիրիայում ականանետային հարձակում է գրանցվել թուրքական զինված ուժերի կողմից վերահսկվող տարածքից: