Խաչատուր Սուքիասյանի հետ ունեցել եմ զրույց, բանավիճել եմ և հրաժեշտ տվել. Նաիրի Հոխիկյան

Թուրքագետ, լրագրող Նաիրի Հոխիկյանը ֆեյսբուքյան էջում անդրադարձել է իր և գործարար Խաչատուր Սուքիասյանի հանդիպմանը:

«Լրատվամիջոցներն այսօր տեղեկություն տարածեցին, թե գործարար Խաչատուր Սուքիասյանը հանդիպման է հրավիրել ինձ և, մեջբերում եմ հրապարակումից, «առաջարկ-պահանջ է ներկայացրել՝ դադարեցնել իշխանությունների և հատկապես Նիկոլ Փաշինյանի հասցեին սուր քննադատություններով հանդես գալը»։

Ոչ ոքի համար գաղտնիք չէ, որ Խաչատուր Սուքիասյանը պաշտպանում է Նիկոլ Փաշինյանի գիծը, իսկ ես կտրականապես դեմ եմ նրան։ Բնականաբար, խոսել ենք նաև այդ մասին, և ես ասել եմ, որ Նիկոլ Փաշինյանին համարում եմ ձախողված գործիչ, որը պետք է հեռանա վարչապետի ղեկից՝ հանուն մեր պետականության պահպանման։ Խաչատուր Սուքիասյանն այլ կարծիքի էր։

Մեր զրույցի այլ մանրամասների մասին այս պահին նպատակահարմար չեմ գտնում խոսել, քանի որ դա եղել է անձնական խոսակցություն և հրապարակման ենթակա չէ։

Ինձ ուղղված սպառնալիք կամ պահանջ չի հնչել։ Գործարքի պայմանավորվածություն չի եղել։ Չէր էլ կարող լինել։ Ավելին՝ ես շարունակում եմ ՀՀ կառավարությանն ուղղված իմ փաստարկված քննադատությունը, պատերազմի մասին առանց փակագծերի հրապարակումները, նաև շարունակում եմ համարել, որ այսօր Ռուսաստանի հետ պետք է պահպանել և խորացնել ռազմավարական դաշնակցային կապերը։