Ա. Հարությունյանի հատուկ ներկայացուցչի հաղորդման հիման վրա ԱԱԾ-ն զբաղվելու է «HALO Trust»-ով

Մարտի 11-ին մի շարք լրատվամիջոցների կողմից հրապարակված լրատվության համաձայն՝ Շիրակի մարզի Արթիկ համայնքի ղեկավարի տեղակալը, ով միաժամանակ զբաղվում է նաև Արայիկ Հարությունյանին խորհուրդներ տալով, հայտնել է, որ բրիտանական «HALO Trust» ընկերությունը թուրքական հատուկ ծառայություններին է փոխանցել Արցախում առկա ականապատված տարածքների քարտեզը, որն էլ հնարավորություն է տվել 44-օրյա պատերազմի ժամանակ բարեհաջող հաղթահարել Արցախի ՊԲ-ի պաշտպանական ականապատված տարածքները։

Արայիկ Հարությունյանի հատուկ հանձնարարությունների գծով ներկայացուցիչ՝ Բորիս Ավագյանը մասնավորապես հայտնել է.

«Հավաստի աղբյուրներից ինձ հայտնի է դարձել, որ «HALO Trust» ընկերությունը, որն աշխատում էր բրիտանական բարեգործական կազմակերպության անվան տակ ու զբաղված էր ականների չեզոքացման աշխատանքներով, Արցախում աշխատած ժամանակահատվածում ձեռք է բերել հայկական կողմի ականապատված տարածքների քարտեզներն ու փոխանցել թուրքական հատուկ ծառայություններին։ Սրա պատճառով պատերազմի ժամանակ հակառակորդը կարողացել է բարեհաջող կերպով անցնել ականապատված տարածքներով։ Վտանգավոր տարածքները ուսումնասիրելու անվան տակ այս ընկերությունն իրականացրել է հետախուզական գործողություններ Արցախի ամբողջ տարածքում»:

Նույն օրը Արցախի Հանրապետության նախագահի մամուլի խոսնակ Լուսինե Ավանեսյանը հայտնել է.

«Բորիս Ավագյանն այդպիսի լիազորություն չունի:  Նշեմ նաև, որ անձնական տեսակետն արտահայտելու  հարցում  Ավագյանը կաշկանդված չէ: ՀԱԼՈ Թրաստ  կազմակերպությունը երկար տարիներ աշխատել է Արցախում և առայսօր շարունակում է իր գործունեությունը»,-ասաց Արցախի նախագահի մամուլի խոսնակը:

«HALO Trust»-ը հայտարարությամբ հերքել է Արայիկ Հարությունյանի հատուկ հանձնարարությունների գծով ներկայացուցիչ Ավագյանի տեսակետը: Հայտարարության մեջ հատկապես ասվում է.

«ՀԱԼՈ Թրաստ-ը տեղյակ է այն պնդման մասին, որ այն 2020 թ.-ի Ղարաբաղյան պատերազմի ընթացքում կամ դրանից առաջ թուրքական ուժերին ականադաշտերի քարտեզներ է փոխանցել։ Ավելի քան 20 տարիների ընթացքում ՀԱԼՈ Թրաստ-ը աշխատել է Ղարաբաղում’ տեղական բնակչության կյանքը անվտանգ դարձնելու համար։ ՀԱԼՈ Թրաստ-ը կարողանում է աշխատել հակամարտության գոտիներում ամբողջ աշխարհում միայն այն պատճառով, որ այն ոչ-քաղաքական և չեզոք կազմակերպություն է։ Այս պնդումը բացարձակապես սուտ է»։ 

Մարտի 12-ին ԱՀ դատախազությունը հայտնել է, որ Արթիկ համայնքի փոխքաղաքապետի արտահայտության հիման վրա կազմված լրատվությունը «դատախազության կողմից այսօր ուղարկվել է ԱՀ ազգային անվտանգության ծառայություն` ԱՀ քրեական դատավարության  օրենսդրությամբ սահմանված ընթացակարգով քննարկելու համար:

Հիշեցնենք, որ Արայիկ Հարությունյանի հատուկ ներկայացուցիչը մաքսանենգության մեղադրանքով ձերբակալված է եղել Մոսկվայում և փախել էր տնային կալանքից: