Վարույթ իրականացնող մարմինն ակնհայտ սխալ պատկերացումներ ունի VPN-երի եւ IP հասցեների մասին․ Բեքարյանի փաստաբան

Ինչպես Կարեն Բեքարյանին, Արա Սաղաթելյանին, այնպես էլ Արամ Սարգսյանին ֆեյսբուքյան որեւէ ֆեյքի հետ կարելի է կապել այնքանով, որքանով յուրաքանչյուրիս ու բոլորին: Այս մասին ֆեյսբուքյան իր էջում գրել է Բեքարյանի փաստաբան Գոռ Միքայելյանը։

«Ես Արամ Սարգսյանի պաշտպանը չեմ, բայց պարոն Բեքարյանի կալանքի միջնորդությանը կից նյութերից առերեւույթ կերպով պարզ է, որ ինչպես Կարեն Բեքարյանին, Արա Սաղաթելյանին, այնպես էլ Արամ Սարգսյանին ֆեյսբուքյան որեւէ ֆեյքի հետ կարելի է կապել այնքանով, որքանով յուրաքանչյուրիս ու բոլորին: Ակնհայտ է, որ վարույթ իրականացնող մարմինն ակնհայտ սխալ պատկերացումներ ունի VPN-ների եւ IP հասցեների աշխատանքի վերաբերյալ, որոնք նշված համակարգերի աշխատանքի վերաբերյալ մինիմալ գիտելիք կամ պատկերացում ունեցող անձի մոտ ժպիտ են առաջացնում։

Էլ չեմ խոսում այս սխալ եզրակացությունների հիման վրա արված իրարամերժ իրավաբանական որակումների (օրինակ՝ նույն գործողությունը որակվել է ՀՀ քրեական օրենսգրքի 226-րդ եւ 226.2-րդ հոդվածով, ինչն արգելված է ՀՀ քրեական օրենսգրքով) կամ Սահմանադրականի դատարանի որոշմամբ փաստացի գործողությունը դադարեցված 307.4-րդ հոդվածով մեղադրանքի առաջադրման մասին։

Հ.Գ. Էս պայմաններում Երեւան քաղաքի առաջին ատյանի ընդհանուր իրավասության դատարանի «խեղճ» նախագահը առանց դատավորների նկատմամբ բիրտ ճնշումների ո՞նց ապահովեր պատվերի կատարումը»,- գրել է նա։