Նիդեռլանդներում խիստ ախտածին թռչնագրիպի բռնկում են հայտնաբերել

Թռչնագրիպը գրանցվել է հոլանդական Հյուսիսային Բրաբանտ նահանգի Սինտ-Ուդենրոդե քաղաքի թռչնաբուծական ֆերմայում, ասված է Նիդեռլանդների գյուղատնտեսության նախարարության հայտարարության մեջ, փոխանցում է «ՌԻԱ Նովոստին»:

Նշվում է, որ սա հավանաբար թռչնագրիպի խիստ ախտածին տարբերակ է:

«Ձեռնարկությունից 1 կմ շառավղով կա եւս երկու թռչնաբուծարան․․․ Վարակված թռչնաբուծարանում կա շուրջ 35 000 թռչուն, իսկ մյուս երկու տնտեսություններում պահվում են համապատասխանաբար 49 920 եւ 47 000 հավեր»,- ասվում է գյուղնախարարության հաղորդագրության մեջ։

Նախարարությունն ընդգծել է, որ թռչնաֆաբրիկայի եւ երկու տնտեսությունների բոլոր հավերը կոչնչացվեն՝ վիրուսի տարածումը կանխելու նպատակով:

Նիդեռլանդների իշխանությունները հայտարարել են Սինտ-Ուդենրոդեում թռչնաֆաբրիկայի շուրջ 10 կիլոմետրանոց գոտում թռչուններ տեղափոխելու արգելքի մասին:

«Փոխադրման արգելքը վերաբերում է թռչնամսին, հավկիթին, թռչնաղբին եւ օգտագործված տակդիրներին, ինչպես նաեւ այլ կենդանիներին ու անասնաբուծական արտադրանքներին այն տնտեսություններից, որտեղ թռչուններ են բուծում կոմերցիոն նպատակներով»,- տեղեկացրել են նախարարությունում: