Հաստատում ենք 161 հատ 8,5 մետրանոց ավտոբուսների գնումը. դրանք չինական են լինելու․ Մարության

Բոլորիդ հայտնի է, որ անգլիական WYG ընկերությունը մեզ համար նոր ավտոբուսային ցանց է նախագծել, ըստ որի՝ 850 ավտոբուս պետք է ունենանք, որից 450-ը պետք է լինեն 7,5-8,5 մետրանոց, մնացածը՝ 12 եւ 18 մետրանոց․ այսօր՝ փետրվարի 12-ին, Երեւանի ավագանու արտահերթ նիստում հայտնեց քաղաքապետ Հայկ Մարությանը:

«Այս պահին մենք հաստատում ենք 161 հատ 8,5 մետրանոց ավտոբուսների գնումը: Սա բավականին երկար ու դժվար աշխատանք է պահանջել: Առկա պայմաններում շատ գործարարներ վախենում են պայմանագրեր կնքել՝ թե՛ համայնքի, թե՛ պետական մասշտաբով, բայց մենք վստահեցրել ենք, որ կկատարենք մեր պարտավորությունները, իրենք էլ կկատարեն մատակարարումը: Ծրագիրը պետք է շարունակական լինի:

Նաեւ ՎԶԵԲ-ի եւ կառավարության հետ համատեղ 1 անգամ չի կայացել 12 մետրանոց ավտոբուսների գնման տենդերը: Եվս մեկ անգամ տենդեր է դրվել, որը կբացվի մարտի 31-ին: Հուսանք, որ այս անգամ կկայանա: Այստեղ 100 հատ 12 մետրանոց ավտոբուսների մասին է խոսքը»,- ասաց նա:

Մարությանի խոսքով՝ այս ծրագրի իրագործման արդյունքում կձերբազատվենք միկրոավտոբուսներից, որոնք ե՛ւ վտանգավոր են, ե՛ւ պրոբլեմատիկ են, ե՛ւ անհարմար։

Քաղաքապետը հավելեց, որ 7,5-8,5 մետրանոց ավտոբուսները 95 տոկոսով արտադրում են միայն Չինաստանում։ «Չինաստանում ավտոբուսների արտադրությունը շատ առաջ է գնացել, եւ գերմանական, շվեդական, հոլանդական շատ քաղաքներում տենդերները հաղթում են հենց չինական ավտոբուսները, հատկապես՝ էլեկտրաբուսները՝ որակով անցնելով եվրոպական շատ արտադրողների: Այստեղ մեզ համար ոչ թե երկիրն է, որ արտադրում է, այլ թե ինչ պարամետրերի է համապատասխանում, իսկ մենք բարձր պարամետրեր ենք դրել: Բավականին շատ լավ գին ենք ստացել այս որակի ավտոբուսների համար: Եթե գործարքը կայանա, կհամարեմ սա լավագույն ձեռքբերումը Երեւանի համար»,- ասաց Մարությանը: