Լիբանանում սպանվել է Բեյրութի նավահանգստում տեղի ունեցած պայթյունի հետևանքները նկարահանող լուսանկարիչը

Լուսանկարիչ Ջոզեֆ Բադջանին, որը նկարահանումներ էր իրականացրել Բեյրութի նավահանգստում օգոստոսի 4-ին տեղի ունեցած պայթյունի վայրում, երկուշաբթի անհայտ անձանց կողմից գնդակահարվել է Քահալիա բնակավայրում. հաղորդում է լիբանանյան «Ալ Ջադիդ» հեռուստաալիքը:

Հեռուստաալիքի տվյալներով՝ հատուկ ծառայություններին հաջողվել է պարզել մահացածի գտնվելու վայրը՝ հետախուզելով նրա հեռախոսը, ինչն էլ իր հերթին օգնել է ձայնագրություններ ստանալ հանցագործության վայրում գտնվող հսկիչ տեսախցիկներից: Նախնական տվյալներով ՝ մարդասպանները եղել են երկուսը: Նրանք մեքենայով մոտեցել են լուսանկարչին այն պահին, երբ նա նստում էր իր մեքենան, և գնդակահարել են նրան:

Քիմաթիա բնակավայրի քաղաքապետարանը երկրի անվտանգության ծառայություններին կոչ է արել անհապաղ որոնողական աշխատանքներ իրականացնել և ձերբակալել լուսանկարչի սպանության մեջ ներգրավված անձանց:

Քիմաթիայի քաղաքապետարանի ղեկավարը նաև, հղում անելով լրատվամիջոցներին, խնդրել է զգուշորեն հրապարակել հանցագործության հետ կապված ցանկացած տեղեկություն և սպասել պաշտոնական հայտարարությանը:

Լրատվամիջոցների հաղորդմամբ՝ Բաջանին աշխատել է որպես լուսանկարիչ հեռահաղորդակցական ընկերություններից մեկում, իսկ որոշ տեղեկությունների համաձայն՝ երկրի անվտանգության ծառայություններից մեկում եղել է հավատարմագրված լուսանկարիչ: Ըստ «Ալ Հուրա» հեռուստաալիքի՝ Բաջանին վերջերս նկարահանել էր Բեյրութի նավահանգստում տեղի ունեցած պայթյունի վայրը: Սպանությունը լայն արձագանք է գտել լիբանանյան հասարակության շրջանում: