ԱՄՆ-ը շարունակում է թալանել սիրիացի ժողովրդին. ՄԱԿ–ում Իրանի մշտական ներկայացուցիչ

Նոյեմբերի 26-ին ՄԱԿ-ում Իրանի Իսլամական Հանրապետության մշտական ներկայացուցիչ Մաջիդ Թախտ-Ռավանչին ԱՄՆ պատժամիջոցներն «անօրինական, անմարդկային և ձախողման դատապարտված» է համարել՝ հայտարարելով, որ ամերիկյան զորքերը թալանում են սիրիական նավթն ու բնական պաշարները՝ շարունակելով իրենց օկուպացիոն գործունեությունը Սիրիայում: Այս մասին հայտնում է իրանական IRNA գործակալությունը:

Ելույթ ունենալով  ՄԱԿ-ի Անվտանգության խորհրդի՝ Սիրիայի հարցով նիստում՝ նա նշել է, որ ապօրինի օկուպացիայի, անմարդկային պատժամիջոցների, փախստականների և ներքին տեղահանվածների վերադարձի քաղաքականացման միջոցով որոշ երկրներ պատասխանատու են հակամարտության երկարացման համար, քանի որ փորձում են իրենց կամքը պարտադրել սիրիացի ժողովրդին: «Նման փորձերն անօրինական են, անբարոյական և դատապարտված են ձախողման»,- ասել է իրանցի դիվանագետը:

«Գրեթե 10 տարվա հակամարտությունից հետո Սիրիայի ժողովուրդը շարունակում է տառապել ագրեսիայից, օտարերկրյա օկուպացիայից և ահաբեկչությունից»,- շեշտել է Թախտ-Ռավանչին:

Նրա խոսքով՝ սիրիական ճգնաժամը կարող է լուծվել միայն քաղաքական ճանապարհով, իսկ երկրի ապագան որոշելու իրավունքը պատկանում է բացառապես սիրիացիներին: