Թուրքիայում նախատեսվում են դատական և տնտեսական բարեփոխումներ. Էրդողան

Թուրքիայի նախագահ Ռեջեփ Թայիփ Էրդողանը նոյեմբերի 19-ին կայացած մամուլի ասուլիսում հայտարարել է, որ երկիրը բարեփոխում է նախապատրաստում տնտեսական և դատական ոլորտներում, ինչպես նաև երեք հաստատությունում՝ նախագահի աշխատակազմ, արդարադատության նախարարություն և իշխող «Արդարություն և զարգացում» կուսակցություն: Այս մասին հայտնում է թուրքական Haber7 լրատվական գործակալությունը:

Ըստ նրա՝ արդարադատության նախարարության բարեփոխման շրջանակներում քննարկվում են երկու կարևոր խնդիրներ: Առաջին`վերլուծել նախարարության որոշումները, որոնք ՄԻԵԴ-ը սխալ է ճանաչել, ինչպես նաև բացահայտել դրանց հետ կապված խնդիրները: Երկրորդը մարդու իրավունքների ոլորտում դատավորների և դատախազների մասնագիտական զարգացումն է:

Էրդողանը նաև նշել է, որ դատական և տնտեսական բարեփոխումներն իրականացվում են այս փոփոխություններին զուգահեռ: Մասնավորապես՝ բացահայտվում են առևտրային իրավունքի, պարտքի մասին օրենքի, հարկադիր կատարման և սնանկության օրենքների տերմինաբանության մեջ հայտնաբերված սխալները: Հիմնական նպատակն է «կատարել հստակ քայլեր ներդրումային միջավայրի բարելավման ուղղությամբ» և բարձրացնել ներդրողների վստահության մակարդակը: